كهربا: متعودين على البطولات في الأهلي.. ومعندناش النجم الأوحد زي أندية تانية
تحدث محمود عبد المنعم كهربا لاعب الأهلي، عن بعض الأمور التي تخص القلعة الحمراء في أول ظهور له عقب التتويج بلقب دوري أبطال إفريقيا للمرة الثانية عشر في تاريخ المارد الأحمر.
تصريحات كهربا
وقال محمود كهربا خلال تصريحات مع الإعلامي سيف زاهر خلال برنامج ملعب أون تايم: بطولة إفريقيا على حساب الترجي صعبة جدًا بسبب الظروف التي كنا فيها، وأنا ربنا أنعم عليا أن أي حد يشوفني يحبني، وربنا بيسترها معايا دايما، وهديت في العصبية جدًا واتغيرت لما روحت الأهلي لأني طول عمري من الشخصيات اللي معرفش أكون في مكان وميبقاش ليا لازمة ومبحبش حد يجي عليا ويؤذيني؛ لأني عمري ما أذيت حد ومبخافش من حد غير ربنا، ولما روحت الأهلي مشيت على السيستم وبقيت أهو زي ما أنتو شايفين.. شخصيتي متغيرتش لكن هديت في الأهلي واللي في قلبي على لساني.
وأضاف كهربا: معندناش النجم الأوحد في الأهلي، وعندنا سيستم وأي اتنين بيتخانقوا مع بعض في غرفة الملابس مبتطلعش برة، والجمهور الأهلاوي غير طبيعي وسند لأي واحد بيلبس تيشيرت الأهلي حتى لو في موقف غلط فيه.
وأكمل كهربا: كلنا واحد في النادي وفيه ناس في الأندية التانية بيبقا فيها النجم الأوحد وبتأثر على زمايله كتير، لكن الأهلي فريق جماعي والكل صاحب اللقطة.
وواصل كهربا: معظم البطولات اللي لعبتها مع الأهلي خدتها ومبعدّش البطولات ومعرفش أنا واخد كام بطولة لحد دلوقتي مع النادي ولسة فيه مزيد من البطولات وكل أسبوع في الأهلي ببطولة ومتعودين على البطولات في الأهلي.
واختتم كهربا تصريحاته، قائلا: طول ما فريقي وزمايلي بيفرحوني عمري ما أبقى زعلان ودائما داعم أول لهم حتى لو مبلعبش.. واتعلمت أساعد زميلي اللي بيلعب في مركزي أو مراكز تانية، وقبل كل ماتش بقولهم عاوز أروّح بيتي فرحان بصوت عالي فـ اللاعيبة بيضحكوا عليا.
