كهربا لـ كولر: مينفعش تقول إني رقم 3 في الإعلام
كشف محمود عبد المنعم كهربا نجم النادي الأهلي موقفه تجاه مدرب الفريق مارسيل كولر، عقب تصريح الأخير بأنه المهاجم رقم 3 في ترتيب المهاجمين داخل الفريق.
تصريحات كهربا
وقال محمود كهربا خلال تصريحات مع الإعلامي سيف زاهر: من طبعي إني لما بتكلم مع حد في حاجة أنا مظلوم فيها مبعرفش.. عشان ممكن يحصل مشكلة فـ باخدها جوه نفسي.
وأضاف: أنا هداف الفريق الموسم الماضي والحالي ومبلعبش ودا مخليني زعلان بس جوايا.. وأنا فورمة وجاهز طول عمري وطول ما رجلي في الملعب بتلاقي حاجات انت مش مستوعبها أنا بعملها وأي لاعب لو سألته كهربا بيتمرن ازاي هيقولك أحسن لاعب بيتمرن.
وأردف مهاجم الأهلي: كولر استفزني لما قال إن أنا رقم 3 لأني مبحبش حد يطلّع حاجة جوة النادي برة في الإعلام، واتكلمت مع كولر في النقطة دي، وقرار المدير الفني في الأخر هو اللي بيمشي لكن مفيش لاعب رقم 3 أو 2 في الأهلي لأن كلهم شبه بعض لكن مينفعش تقول كده في الإعلام.
وأكمل محمود كهربا تصريحاته قائلًا: تصريح كولر خلاني أموّت نفسي في التمرين وكل ما أنزل في ماتش بحاول أسجل بأي طريقة.. وأنا تحت أمر الأهلي في أي وقت.. وفي مباراة الترجي كنا مضغوطين ولما نزلت شدّيت الفريق لقدام وربع ساعة زي ساعة في النادي الأهلي.. وفيه لاعيبة بحب ألعب معاها زي حسين الشحات، وبيرسي تاو، وإمام عاشور، ومحمد مجدي أفشة ولو مباصوليش عادي إنما في لاعيبة تانية ممكن أزعّق لو مباصوليش الكورة.
وتابع كهربا: مسمعتش أي حاجة الفترة دي من العروض، ولو فيه فـ أنا سايب القرار لـ الأهلي.. وتأثرت ماديًا الفترة اللي فاتت كتير وأنا راجل وهعمل فلوس تاني طول منا بصحتي.
واختتم محمود كهربا تصريحاته قائلا: أنا على تواصل مع الخطيب اللي بالنسبالي أب روحي ليا وقالي كل ما تنزل كده هات جون وموّت نفسك في أي وقت تنزل فيه، والخطيب عنده هيبة وكاريزما واتعاملت معاه عن قُرب وأنا في أساسًا، لما كنا في بطولة ودية في تبوك وأنا لاعب في اتحاد جدة روحت للخطيب وقولتله ممكن اتصور معاك أنا بحبك جدًا، وأنا أساسًا بحبه من زمان.
