صديق المجني عليه في تحقيقات فتاة الطالبية: جابت السكينة وضربته في صدره
كشفت التحقيقات في القضية التي تحمل رقم 5308 لسنة 2024 جنح الطالبية، المتهم فيها بائعة خضراوات بقتل شخص باستخدام سلاح أبيض “سكين”، لخلاف دار بينهما على أولوية ركوب توك توك، ثالث أيام عيد الفطر المبارك، تفاصيل الواقعة.
صديق المجني عليه في تحقيقات فتاة الطالبية
وجاءت أقوا ل صديق المجني عليه أمام جهات التحقيق كالآتي: أنا اسمي يوسف صاحب خالد محمد المجني عليه هو صاحبي من زمان وعلى طول مع بعض، واللي حصل إن أنا وصاحبي خالد الساعة 10 الصبح كنا بنلعب بلايستيشن وخرجنا مشينا وكنا رايحين البيت وبعدها وقفنا توك توك في شارع العروبة أمام صيدلية الحسيني الطالبية الجيزة وأول ما ركبنا أنا وخالد لقينا واحدة فارشة فرشة خضار ندهت على سواق التوكتوك فراحلها واتكلموا.
وتابع صديق المجني عليه في أقواله أمام جهات التحقيق: بعدها لقينا السواق جاي وبيقولنا انزلوا من التوكتوك عشان صاحبة التوكتوك قالتلي موصلكمش في حته فقولناله ليه إحنا هندفع فلوس عادي زي أي حد لقيناها جاية بتزعق وبتقول انزلوا فنزلنا بنتكلم معاها عادي لقيناها بتقولنا انتوا مبرشمين ولا إيه فزعقنا وقولنالها هو انتي تعرفينا يا ست إنتي عشان تقولي كده وبنقولها في إيه إحنا هندفع فلوس لقيناها بتقلع الشبشب اللي في رجلها وعايزة تضرب خالد بيه، فخالد خده منها وراح ضربها بيه على رأسها لقيناها عمالة تشتم.
وأشار صديق المجني عليه: فإحنا شتمناها إحنا كمان والصوت ارتفع والناس اتلمت ووإحنا واقفين لقيت بتاعة الخضار راحت على الفرشة وجابت سكينة وراحت ضربت خالد في صدره من الناحية الشمال فخالد وقع في ساعتها رحت شلت خالد وركبته توكتوك وطلعت بيه عند مستشفى أم المصريين وهناك قالولي إنه مات والقسم جه وعملنا محضر وعرفت إن بتاعة الخضار اسمها هند وهو ده كل اللي حصل.
وفي وقت سابق، قررت جهات التحقيق، تجديد حبس بائعة الخضراوات، 45 يومًا على ذمة التحقيقات لاتهامها بقتل شخص باستخدام سلاح أبيض، سكين، لخلاف دار بينهما على أولوية ركوب توكتوك، ثالث أيام عيد الفطر المبارك.
وبدأت تفاصيل الواقعة عندما تبلغ لقسم شرطة الطالبية من مستشفى أم المصريين العام، بوفاة أحد الأشخاص عقب وصوله إثر إصابته بجرح طعني نافذ من الجهة اليسرى.
بالانتقال والفحص تبين مصرع أحد الأشخاص يُدعى خالد.م، إثر حدوث مشادة كلامية بينه وبين فتاة بالمنطقة تطورت لمشاجرة على إثر أسبقية استقلال توك توك، فقامت المتهمة بإحضار سلاح أبيض سكين، تستخدمه في فرش الخضار خاصتها، وأحدثت إصابته التي أودت بحياته، وبإجراء التحريات تبين أن مرتكبة الواقعة فتاة تدعى هند وشهرتها هند جرجير، تعمل بائعة خضار.
