قالي أخيرًا.. عمر كمال عبد الواحد يكشف حديث كولر معه عقب انتقاله للأهلي
كشف عمر كمال عبد الواحد عن حديث كولر معه في أول مقابلة بينهما عقب انتقاله إلى الأهلي خلال الانتقالات الشتوية الماضية.
تصريحات عمر كمال عبد الواحد
وقال عمر كمال عبد الواحد نجم النادي الأهلي في تصريحات تليفزيونية: كريم فؤاد بيغل في الملعب وهو مش من نوعية اللاعيبة اللي بترمي الفوطة ومش بيقلب وشه وبيستنى الفرصة.. بيخش يصلي ركعتين شكر وبعدين ولا كأن فيه حاجة.
وأضاف عمر كمال: كنت على طول بشوف جمهور الأهلي في التليفزيون بس ولما شفته من الملعب في نهائي إفريقيا قلت إن ده رعب.. ودافع لأي فريق في العالم يكون عنده جمهور زي جمهور النادي الأهلي.
وأكمل عمر كمال: كولر قالي أخيرا ودي كانت أول مقابلة بينا وبعدين قعد أتكلم معايا في كل حاجة وقالي لازم تعرف أن أنت داخل على نادي ضغوطات ومسؤوليات ورقم واحد هو النجاح مفيش حاجة اسمها فشل ولا وسط.. لازم تبقا قد المسؤولية وقد النادي الأهلي.. وأنا متأكد من ده والدليل إصراري عليك للتعاقد معك لمدة سنتين.
وواصل عمر كمال: كولر نبهني أيضا أنني لن أشارك في كل البطولات عشان مش مقيد إفريقيًا.. فقلت له معنديش مشكلة واللعب ده بتاع ربنا وبتاع المدير الفني وهي قناعات.
وتابع عمر كمال، قائلا: كولر قالي كمان أنت من الناس اللي بتحضّر كورة كويس فعاوز ألاعبك مدافع.. وليا وجهة نظر غير أي حد وأنت مميز بالنسبالي وهتحللي مشاكل كتير في الملعب وأي مدرب في العالم يتمناك.. وأنا في كل مكان بلعب فيه بأدي 100%.
واستطرد عمر كمال: فيه واحدة قريبتنا ماسكة السوشيال ميديا ماعدا الواتساب أنا اللي بتعامل عليه، ومش بتابع ومليش علاقة بالكلام ده.
وأردف عمر كمال: في مباراة البنك الأهلي كل الناس في المؤتمر الصحفي عقب الخسارة قالوا إنها بسبب عمر كمال عشان بيلعب مسّاك.. وعشان كدة قعدت مع كولر قبل مباراة زد وقولتله عايز يحصل أي موقف في الفرقة عشان ألعب مدافع تاني وده مش تقليل من اللاعيبة اللي في نفس المركز؛ لكن عاوز أثبت للناس إني في أي مكان بأدي.. والتوفيق بتاع ربنا.. وهدفي في بلدية المحلة توفيق من ربنا.
وعن علاقته مع سامي قمصان، قال: كابتن سامي قمصان على علاقة بيا من بدري وقالي بعد أول ماتش أنت مش محتاج تثبت أنك لاعب كويس ولو لعبت أقل من الطبيعي هتلاقي نفسك كويس وبتلعب أو مبتلعبش هيجيلك فرصتك متقلقش.
وزاد عمر كمال: لعبت كل المباريات في الدوري عدا الإسماعيلي.. وخدت رجل المباراة في 3 مباريات.. ولو أنا مكنتش بحارب إني أوصل الأهلي يبقا مستحقش أكون هنا وهبقا ضيف شرف.. ومينفعش أخذل جمهور الأهلي وأخلي شكل المدرب مش حلو.. وعلى طول بحاول أبقا 100٪ في التمرين والمباراة.
وعن هدفه في لقاء الاتحاد، قال عمر كمال: أول ما استلمت الكورة في مباراة الاتحاد كنت هلعبها لـ وسام أو أكرم.. لكن لقيت نفسي بشوط.. ومشوفتش الهدف إلا بعد ما روحت في التليفزيون.
واختتم عمر كمال عبد الواحد تصريحاته، قائلا: في مباراة بلدية المحلة.. سامي قمصان قالي أنت نازل تهاجم وهتجيب جون وهتكسبنا.. وبشكر رامي ربيعة عشان وسعّلي.
