سيف جعفر: لو بيراميدز مكنش مشاني كنت مضيت للزمالك.. وأتمنى انضمام الشيبي للقلعة البيضاء
تحدث سيف جعفر عن بعض الأمور الخاصة بفريق الكرة الأول بنادي الزمالك، وعن بعض اللاعبين الذين لعب بجوارهم، وعلاقته مع مدرب الفريق جوزيه جوميز.
تصريحات سيف فاروق جعفر
وقال سيف جعفر في تصريحات تليفزيونية: أن أنت تبقا ابن لعيب كورة ده ليه مخاطر وطريقه أصعب؛ ممكن الناس تبقا مش بتتمنالك النجاح عشان بيكرهوا والدك، أو حاجات من دي، وكل حاجة ليها الحلو والوحش ولما تبقا ابن حد الناس بتبص عليك أول حاجة لكن ممكن بطريقة مش إيجابية وصعوبتها أكتر من إيجابيتها.
وأضاف سيف جعفر: الزمالك من غير قيد توّج بـ الدوري والكأس وكان ماشي بشكل كويس.. وساعتها كان لازم يبقا المدرب جرئ ومحتاجة كباتن الفرقة يبقوا كبار ومش هنسى دور شيكا معانا والسنة التانية كان بيقولنا متخافوش من حاجة واعملوا اللي إنتو عايزينه.
وأكمل سيف جعفر تصريحاته، قائلا: شيكا أسطورة من أساطير الكرة المصرية ومن أعلى 3 لاعيبة في النادي أن مكنش هو أعلى واحد وخارج تقييم أي مقارنة وفي حتة تانية.
وواصل سيف جعفر: هناك لاعبين ميجا ستار في الزمالك مثل محمد عبد الشافي، وعبد الله السعيد الأسطورة التي لن تتكرر مرة أخرى ومن أفضل لاعبي مصر آخر 25 عاما وخارج التقييم، وعمر جابر من أحسن وأنضف الناس اللي تتعامل معاها، والونش من أحسن المدافعين في الكرة المصرية، أما زيزو فهو لاعب ميجا ميجا ستار، وعايش حياة لعيب الكورة المثالية، وفيه لاعبين على هذا الطريق وأبرزهم أحمد فتوح.
وأوضح سيف جعفر خلال تصريحاته: أنا كان نفسي ألعب مع شيكا من وأنا صغير وعبد الشافي شخصية محترمة وبتشرف إني لعبت معاهم، ومع واحد زي طارق حامد واحد من أساطير الكرة المصرية وبن شرقي أجمد المحترفين اللي جم مصر على مدار التاريخ، وبتمنى بن شرقي يرجع الزمالك لأنه أكتر من أخويا.
وأردف: جوميز على طول يتحدث معي ويقول لي أنه سيكون لي دور خلال الفترة المقبلة مع الزمالك، وكل مدرب ليه طريقته، وجوميز لما بيلاقي حد بيتمرن ومركّز بيقوله كلام يشجعه، والدنيا كانت متلغبطة الفترة اللي فاتت عشان كان فيه ناس مش بتلعب في إفريقيا.
واستطرد سيف جعفر: فتوح لاعب كبير وسوف يستعيد فورمته عندما يعود من الإصابة وبيحل أي مشاكل للنادي لأن عنده طرق لعب عديدة.
وتابع سيف جعفر: مش شايف أن حد بديل حد، وكل لاعب كورة له نظامه، وحال الكرة متغير، ولعبت مكان إمام عاشور في فترة ما، ولو كنت بلعب باستمرار كان ممكن المردود يبقا أكتر من كدة.
وزاد خلال تصريحاته: التنافس في مصلحة الفريق، وأن كل لاعب عاوز يبان بشكل كويس ده في مصلحة نادي الزمالك، وببقا مرتاح وأنا بلعب مع دونجا وعبد الله السعيد اللي بيسهّل لعب أي حد بيلعب معاه زي شيكابالا لكن شيكا بيبقى عايز يسيّط الناس اللي حواليه، وسيد نيمار مظلوم لأنه لا يأخذ فترات عديدة وكل لاعب لديه حلول في الزمالك.
وعن المقارنة بين طارق حامد ودونجا، قال سيف جعفر: طارق حامد إنسان مجتهد للغاية وكان بييجي قبل التمرين بساعتين أو بساعة ونص لكني شايف أن دونجا لو خد الوقت الأكبر في المشاركة هيبقى حاجة كويسة في الوقت ده.
وكشف سيف جعفر خلال تصريحاته: أصعب لحظة في حياتي عندما قيل أنني ضربت الإداري وسرقت العقود، ومكنش يصح الناس تطلّع صورتي بالشكل ده وعمري ما زعلّت أو اتخانقت مع حد، وكفاية إني أشوف التالتة يمين متقفلة وبتشجعني وبتشجع الفريق وكنت هبقى مجنون لو أنا كنت عاوز أمشي بمزاجي.
وتابع: قولت للمجلس الحالي معنديش مشكلة أرجع وقولتلهم همضي للزمالك ولو أتوقفت عادي يعني المهم أرجع الزمالك، ولو بيراميدز مكنش مشاني كنت مضيت للزمالك بردوا.
وأكمل سيف جعفر: أول مباراة لي مع بيراميدز كانت صعبة عليّ لأنها كانت ضد الزمالك، وفي الأول والآخر ده أكل عيشي وشغلي، ولكنه كان إحساس صعب للغاية، وممكن فريق تاني هو اللي ياخد الدوري غير الأهلي والزمالك.
وأضاف: نفسي مصطفى فتحي يرجع الزمالك لأنه موهوب، ورمضان صبحي نفسي يبقا في الزمالك ومحمد الشيبي باك رايت عصري ونفسي بردو يبقا موجود في الزمالك، وأسامة جلال.
واختتم سيف جعفر تصريحاته، قائلا: وارد أي حد يغلط في الملعب وإحنا في الفترة دي أسرة واحدة والزمالك من ساعة ما جوميز جه وهو لامم اللاعبين، وشيكا وعمر جابر قافلين على الفريق ونحاول ناخد بطولة تانية السنة دي، وإدارة الزمالك قافلين على الفريق وطول الوقت موجودين معانا ودي حاجة تُحسبلهم وكان بقالنا فترة مش بنشوف ده.
