يحيى الفخراني: الفنان عنده التزامات ومبياخدش ملايين.. ولازم يشيل فلوس للزمن
قال الفنان يحيى الفخراني، إن كل ما يتم نشره عن أجور الفنانين عارٍ تمام من الصحة، موضحًا أن الفنان لديه العديد من الالتزامات، موجهًا نصيحة للفنانين بضرورة ادخار الأموال.
وقال يحيى الفخراني، في تصريحات تليفزيونية: الفنانين بيعلوا على بعض والملايين والمليارات اللي بيقولوها دي مش طبيعية ولا حقيقية، المسألة مستورة جدًا، والفنان بيبقى عنده التزامات كتير جدًا وفي ناس شايلة عائلات وعاملين زي عمال الترحيل، لازم الفنان ياخد باله أن الفلوس دي للزمن ولو أن معاش النقابة مبيعملش حاجة للفنانين الكبار.
يحيى الفخراني: طالبت بحق الأداء العلني للفنان حفاظًا على كرامته
كما أكد الفنان يحيى الفخراني مطالبته بحماية حق الأداء العلني للفنان، وذلك خلال الجلسة العامة لمجلس الشيوخ، موضحًا: طالبت بحماية حق الأداء العلني للفنان حفاظًا على كرامته، أنا عاصرت ابن إسماعيل ياسين وهو مش لاقي ياكل، وإسماعيل ياسين ده أنا بقول كمثل أنه أكثر الممثلين جماهيرية وكسب كتير جدًا، وسمعت عن إسماعيل ياسين أنه دخل يعمل مونولوجات وهو على كرسي متحرك علشان بس لقمة العيش، ده يهز شكل مصر مش بس الفنان.
وأضاف يحيى الفخراني: لازم يكون في خصوصية للفنان، وأنا تأذيت في عزاء صلاح السعدني واكتشفنا أنهم مش صحفيين، ده لازم يتحجم ويكون في صحفي أو اتنين لتغطية أي حدث، يعني وأنا في بيتي خلاص انتهينا وحياتي الخاصة محدش له دعوة بيها ولكن الناس بتحب تتعرف على حياة الفنان، ولكن من وقت لآخر الفنان لازم يتفاعل مع الناس.
