أحد المتهمين باحتجاز طالب طب أكتوبر: صحوني وقالولي الواد رمى نفسه| تحقيقات
كشفت التحقيقات في واقعة إقدام طالب جامعي يدعى عبد الرحمن. ع، على إنهاء حياته من شرفته، أنه تعرض للتهديد من قبل مجموعة من زملائه بالسكن والتعدي عليه بالسب والضرب لخلافات مالية وعدم قدرته على سداد أموال اقترضها منهم في عمله بمنصات رقمية.
تحقيقات احتجاز طالب طب أكتوبر
وأمام جهات التحقيق قال حسين،ج أحد المتهمين باحتجاز طالب طب أكتوبر الذي ألقى بنفسه من شرفة الشقة: اللي حصل إني ساكن في الواسطى وعلشان طبيعة شغلي بتنقل كثير فأنا مأجر من شهر 11 سنة 2023 شقة سكن مصر علشان أبقى أريح فيها شوية لو أنا جنب أكتوبر أو حاجة، وفي شهر 2 اللي فات كده لقيت واحد صاحبى وجاري اسمه عبد الرحمن حسني بيكلمني بيقولي إن في واحد غلبان تبعه قاصد يبات في الشقة بتاعتي يومين كده ولا حاجة علشان هو غلبان وملوش حد، فأنا وافقت وقولتله تمام وفعلا قعد يومين بس لما زود شوية وحب يقعد رفضت، فراح عبد الرحمن حسني قالي أنا هدفعلك إيجار الشقة وسيبه قاعد فيها عادي وبالفعل عبد الرحمن دفعلى إيجار الشقة مرتين، وفي خلال الشهرين دول عرفت من عبد الرحمن حسني إن اللي قاعد في الشقة دا اسمه عبد الرحمن،ع وإنه بيضارب في البورصة وكلمني عبد الرحمن،ع وأقنعني أديله فلوس أشغلها في البورصة وفعلا يوم 5 مارس 2024 اديتله 50 ألف جنيه على أساس أشغلهم معاه ويبقى يديني أرباحها.
وتابع المتهم: ويوم 28 مارس 2024 روحت الشقة عنده وكان معايا عبد التواب والدكتور يوسف ودخلنا الشقة وقولتله في أرباح قالي لأ مفيش فأنا قلقت وقلتله طيب هات فلوسي فحولي 5000 جنيه على فودافون كاش، ولقيته بيكلم عبد الرحمن، ح وياسر، م وقالهم في التليفون تعالوا حسين عايز فلوسه وكان بيشتكلهم إني عايز قبل الشهر ما يخلص فهما لقيتهم جم الشقة ولما وصل عبد الرحمن، ح وياسر لقيتهم بردو بيطلبوا وبيقولوا إني معايا حق وإنه لازم يجيب فلوسنا دلوقتي.
أحد المتهمين: صحاني وقالي الواد رمى نفسه
وأردف المتهم: روحنا لقينا المجني عليه قالنا الفلوس في البورصة، واتصلوا بمحمد أخو عبد الرحمن وقالوله إحنا لينا عند أخوك فلوس وطلبوا منه إنه يتنازلوا عن الشقة اللي معاه ليهم، فرفض وقالهم أنا مليش دعوة بأخويا ولما طلبت فلوسي من محمد أخوه بعدها رفض بردو وقالنا سلموا أخويا للشرطة وإنتوا اللي غلطانين إنكم وثقتوا فيه، والكلام ده كان الساعة 5:00 الفجر فقولنا خلاص هننام في الشقة ونبقى نروح الصبح على القسم بيه وفعلا نمت وقومت ثاني يوم على صوت عبد الرحمن بيقولي برعب الواد رمی نفسه ولقيت كلهم بيجروا من الخوف فجريت معاهم من الخوف ومكنتش عارف أروح فين فكلمت واحد صاحبي عنده شقة في التجمع وقولتله إني هبات عندك يومين وهو وافق من غير ما أعرفه أي حاجة وبعد كده كنت ناوي أسلم نفسي ثاني يوم بس لقيت الشرطة جايين عليا يوم 29 مارس 2024 في الشقة ومسكوني وأنا هناك وهو ده كل اللي حصل.
ويُحذر موقع القاهرة 24 من الانتحار أو إزهاق النفس بأي شكل من الأشكال، ويطالب الأشخاص الذين يمرون بأزمات نفسية التوجه لأقرب طبيب نفسي لحل أي أزمة يمرون بها.
