أحمد خالد موسى يكشف تفاصيل انتهاء دور فريدة سيف النصر في مسلسل العتاولة
تحدث المخرج أحمد خالد موسى، لأول مرة عن سبب انتهاء دور شخصية سُترة التي قدمتها الفنانة فريدة سيف النصر، بمسلسل العتاولة، الذي عُرض في السباق الرمضاني 2024، وحقق نجاحًا كبيرًا منذ بداية عرض أولى حلقاته.
وقال أحمد خالد موسى، خلال ندوته بالقاهرة: ردود الفعل على مسلسل العتاولة كانت حلوة جدًا، ولكن علشان أكون صريح إحنا كان عندنا خيوط كتير أوي في الـ 3 حلقات الأخيرة وكانوا بشكل مختلف، وده كان هيدمر فكرة الجزء الثاني للمسلسل.
وأضاف: بنشوف المسلسلات برا لما بيبقوا عايزين يكملوا لـ نفسهم جزء تاني بيبقوا سايبين لنفسهم باب يقدروا يطلعوا منه، وده أنا عملته في ملوك الجدعنة ولص بغداد وبعد البداية، اللي هما يستحملوا جزء تاني، وفكرة أنك تقفل المسلسل بخطوط تساؤلات تدربك الناس ده مهم جدًا.
وأوضح: إحنا مستقرين وبنكتب ومعانا 5 حلقات دلوقتي من الجزء الجديد من العتاولة 2، وممكن على آخر الشهر اللي جاي يكون معانا 15 حلقة، فاحنا لازم ندربك الناس بأسئلة كتير ممكن نجاوب عليها في أول حلقة بالجزء الثاني، أو الحلقة الخامسة على سبيل المثال، وأنا في وجهة نظري أن الجزء الثاني لو مشي بنفس النمطية مش هيبقى مدهش.
فريدة سيف النصر تعلق على انتهاء دورها بمسلسل العتاولة
وسبق وأن علقت الفنانة فريدة سيف النصر، على انتهاء دورها بمسلسل العتاولة، وعدم مشاركتها في الجزء الثاني من العمل والذي من المقرر عرضه خلال السباق الرمضاني القادم 2025، حيث قالت في تصريحات تليفزيونية: موتوا سترة لظروف خاصة بيهم بس لو كتبوا سترة ورجعوها هرجع، ومش هينفع أدخل عليهم بالعافية أقولهم جبوني، ولو القصة خطوطها انتهت على كده، دي رؤية مخرج.
وواصلت: حب الناس وتعلقهم بيا وإنهم مش عاوزين سترة تموت.. لكن الأحداث أهم ولو رجعوها هشتغل دوري، وسترة دي بعتبرها بنتي وأحمد موسى حبيبي، وأنا اجتنبت وقولت دي رؤية مخرج لو حطوني على عيني وعلى راسي ولو محطونيش خلاص.
