سيدة تحذر أهالي الحُجاج وتقترح: اكتبوا لهم أرقام تليفون في ورقة واربطوها في أيديهم
نشرت إحدى الحاجّات فيديو عبر حسابها على منصة فيس بوك، تنصح الجميع بتوخي الحذر ومراعاة كبار السن، منعًا لما يتعرضون له من أزمات أو فقدانهم.
سيدة تنصح الحُجاج: قابلت ست تايهة ومتعرفش العنوان
وقالت الحاجة رضا جندية عبر فيديو على صفحتها الخاصة: شوفت حاجة مصرية تايهة، سيدة بسيطة شبه أمي وأمكم.. مابتعرفش تقرأ وتكتب، وسألتها لو معاها أرقام تليفونات أتواصل معاها، قالت لي لأ، وسألتها طب انتي ساكنة فين قالت لي في العزازية، لكن ماتعرفش العنوان ولا أي حاجة تانية.
وأضافت الحاجة رضا: الست بكيت من كتر التعب.. وأنا واقفة عاجزة مش عارفة أعملها إيه، وفضلت ماشية معاها لحد ما سلمتها للشرطة.
الحاجة رضا: اكتبوا لهم أرقام تليفون في ورقة
ونصحت متابعيها، قائلة: يا جماعة اللي ساكن معاه أو حد من قرايبه الناس البسيطة أوي دي، اللي هي عمرها ما خرجت من قريتها إلا لهنا للسعودية، مش معاها موبايل ولا تعرف حتى تستخدمه، اكتبوا لهم أرقام تليفون في ورقة واربطوها على معصمهم، أو تحطها في أي حاجة معاها.
وتابعت: ماينفعش تسيبوا الناس دي تخرج كده، الناس دي تعبانة، انتوا مش هتتخيلوا المشي اللي احنا بنمشي والتعب اللي احنا بنتعبه، ودي كانت ست كبيرة ومنظرها كان صعب جدًا.
الحاجة رضا: ما تسيبهمش يخرجوا من البيت
واختتمت: الله يرضى عليكم لما يكون معاكم ستات كبيرة أو ناس كبيرة زي دول، ما تسيبهمش يخرجوا من البيت من غير وسيلة تعينهم أو تعين اللي يقابلهم على أنه يتواصل معاكم عشان نوصلهم بأهلهم.
والجدير بالذكر أن موسم الحج لهذا العام 2024، شهد العديد من حالات الفقدان والوفاة والإصابة لكثير من الحُجاج بين النساء والرجال، ما دفع مستخدمي مواقع التواصل الاجتماعي نحو محاولات إيجاد حلول للتقليل من خطر فقدان الحُجاج التائهين أو حالات الوفاة دون الوصول لأهل صاحب الجثمان.
