أبرز تصريحات أحمد سعد: طول عمري بتعالج نفسيًا.. ولو حكيت لـ أصحابي يفضحوني ويعايروني
حل الفنان أحمد سعد، ضيفًا على الإعلامي محمود سعد، في برنامج Sold Out، وتحدث خلال اللقاء عن تفاصيل خضوعه للعلاج النفسي، وتفاصيل طلاقه من زوجته الرابعة علياء بسيوني، وحياته الشخصية.
أبرز تصريحات أحمد سعد في برنامج Sold Out
- أنا بروح لدكتور نفسي طول حياتي، وده أعظم شيء في العالم، والدكاترة النفسيين فيهم حاجتين مهمين أول حاجة أنك بتحكي لحد هو مش عارفك ولا يعرف أقاربك ولا ناسك.
- أهم شيء على وجه الأرض هو أنك تطلع الحاجة من جواك لـ برا، ده بيخليك أحسن كتير جدًا.
- إحنا وصلنا لأعمار معينة ومفيش حاجة اسمها أنك تصلح عيوب عندك، الناس كلها فاكرة إن المرض النفسي إن الشخص يكون مشلول مثلًا، ولكن تصرفاتنا العادية وبندير بيها أمور حياتنا ليها علاقة بالمرض النفسي.
- الدكتور النفسي بيعلمك إزاي تتعامل مع عيوبك، فأنا شايف إن دول من أهم الحاجات في حياتي، وأنا مبحبش أصاحب الدكاترة، ومهم أنه يقدر ياخد منك الكلام وميتأثرش باللي بتحكيه.
- مينفعش أحكي حاجة لـ أصحابي، يفضحوني ويعايروني.
- علياء لغاية دلوقتي هي الزوجة الرابعة، بس أنا تمام كده مش عايز أتجوز تاني.
- علياء إدتني كل التغيير في حياتي، والست هي المحرك الرئيسي للراجل، وأي راجل كان عظيم كانت الست هي الدافع ليه، وأي راجل فاشل الست هي اللي خلته فاشل، وده من تجربتي في الحياة، أنا فاتح مكتب تجارب.
- الشغل بدأ ياخد من حياتنا الأسرية، وعلياء شخص مجتهد ومحترم جدًا، قعدت مرة واتنين وألف أجاهد على حياتنا الشخصية والأسرية، ولو أنا أناني كنت كملت، لأن أنا الوحيد اللي مستفيد.
- ارتداء الحلق أمر شائع في الغرب، وملوش علاقة بالستات يعني مش بتاع ستات بس.
- أخويا عمرو بينتقدني بشكل وحش أوي، لما بسمعه أغنية بكون تعبان فيها أوي يقولي إيه القرف ده، بس الناس دي مهمة في الحياة، اللي بيقولولك كلام مفيهوش مشاعر.
- عمرو من أهم الناس اللي أنا بتسند عليه دلوقتي هو وجمهوري.
- أمي أحب حد في عمري، هي ست طيبة جدًا وكان عندها 9 أولاد وبتذاكر لينا كلنا وعرفنا إنها مبتعرفش تقرأ غير بعد 3 إعدادي، هي ست عظيمة جدًا.
