مدرب التيك توكر أحمد مانو لاعب الباركور بعد وفاته: نصحته كتير لكن الناس شجعته على الغلط| خاص
أثارت الجدل واقعة وفاة التيكتوكر احمد مانو على السوشيال ميديا، بسبب ما كان يقدمه خلال فيديوهات لعبة الباركور، بحركاته الغير احترافية اثناء سقوطه على الأرض مما تسبب في إصابته بشكل متكرر ووفاته بشكل مؤسف.
ضحية مجتمع السوشيال ميديا.. مدرب احمد مانو يكشف التفاصيل
وقال مدرب الباركور عمر ياسر في تصريحات خاصة لـ القاهرة 24، باعتباره المدرب الشخصي لـ أحمد مانو في السنة الأخيرة، إن حالة مانو الصحية كانت متدهورة في الأيام الأخيرة بسبب كسر العمود الفقري، ومع شدة التورم تم الضغط على الجهاز التنفسي، ما أدى إلى الوفاة، قائلًا: كان بيعمل كدة عشان الفيديوهات تجيب نسب مشاهدة أعلى، وبناءً على تعليقات الناس بـ لا اعمل فيديوهات بتقع فيها.
وعقب المدرب عمر على بدايات أحمد مانو في ممارسة تمارين الباركور: هو بدأ اللعبة في 2016، وكان بيعمل فيديوهات تمارين باركور في البيت وفي الشارع، مؤكدًا أن المدربين الذين أسسوه في البدايات هم السبب، قائلًا: العيب على المدربين اللي أسسوه في اللعبة، كانوا عايزين يتشهروا عشان هو عنده مشاهدات، وبيتصوروا معاه ويخلوه يقع وقعات غلط عشان الفيديوهات تتشاف.
المدرب عمر ياسر: كان من ذوي الهمم العقلية وده سبب مشكلة
وأضاف: أنا لما شوفت الفيديوهات دي كلمته عشان ييجي يتمرن معايا، وهو كان عارفني ووافق، وفي خلال شهر جه يتمرن، وبدأت معاه بـ الأساسيات لأنها مكنتش موجودة، وكان بيسمع كلامي ومتحمس، لكن بعد شهرين بدأ يحس إن الموضوع صعب، خصوصًا إنه كان من ذوي الهمم العقلية، وده كان مسبب عائق إنه يفهم التمرين بسرعة، ورجع يعمل تاني فيديوهات في الشارع ويقع فيها وقعات خطيرة.
واستكمل عمر: لما خليته يرجع التمرين، كان دايمًا بيرفض يتعامل معاملة المبتدئين ويقولي أنا قديم جدًا، وفي نفس الوقت بحاول أساعده لأن 90% من تمارين اللياقة العادية كان بيعملها غلط، وجسمه مكنش مستحمل الوقعات.
السبب في وفاة أحمد مانو.. تعليقات السوشيال ميديا
وأوضح عمر خلال حديثه: ومع الوقت لما بدأ يتعلم وينزل فيديوهات متطورة، الناس لاحظت ده وبدأوا يكتبوا في التعليقات.. لا ارجع اقع تاني في الفيديوهات وبيتريقوا عليه، وكان عايز يرجع تاني يعمل فيديوهات من اللي بيقع فيها في الشارع عشان يجيب نسبة مشاهدات أعلى، وأنا حاولت أنصحه لكنه مسمعش كلامي.
وأشار مدرب أحمد مانو الخاص، قائلًا: آخر فترة الكل لاحظ إنه جاله مشكلة في التنفس، لكن محدش كان يعرف انها كانت بسبب تورم الكسور والشروخ في العمود الفقري، نتيجة الوقعات الغلط المتكررة.
وسرد تفاصيل آخر تمريناته قبل الوفاة، قائلًا: كان نازل يتمرن مع مدرب من عندي هنا، لكن المدرب حصله ظرف واضطر يلغي التمرين فجأة، لكن مانو كمل تمرين لوحده ووقع، لكن الواقعة كانت مش تقيلة أوي بالنسبة للحاجات اللي كانت بتحصله على الأرض في الفيديوهات.
كسر العمود الفقري.. سبب وفاة التيك توكر احمد مانو
وتابع بـ آراء الأطباء قائلًا: الدكاترة لما شافوا الفيديو بتاع الواقعة دي قالوا مستحيل واقعة زي دي تعمل اللي حصل في ظهره، لكن لما شافوا فيديوهاته القديمة قالوا إن دي حاجات متراكمة، وإن الجسم على المدى البعيد جاله شروخ في الفقرة الرابعة والخامسة، ولما وقع اتكسرت خالص، وقالوا إن كل ده تسبب في الضغط على النخاع الشوكي، والعمليات منفعتش والجسم مستحملش المسكنات وصعوبة التنفس وتوفي، واختتم قائلًا: آخر كلماته معايا، قالي ياريت كنت سمعت كلامك.
