تزامنا مع بداية امتحانات الثانوية العامة.. استشاري نفسي يدعم الطلاب: ابتعد عن المراجعة بعد الامتحان
بالتزامن مع أولى أيام امتحانات الثانوية العامة لعام 2024، ينصح الأطباء النفسيون بضرورة تقديم الدعم النفسي لـ طلاب الصف الثالث الثانوي، مما يعود على صحتهم النفسية وقدراتهم على قضاء فترة الاختبارات النهائية بصحة نفسية أفضل.
استشاري نفسي يدعم الطلاب في أول أيام امتحانات الثانوية العامة 2024
وفي هذا الصدد، أكد الدكتور جمال فرويز استشاري الطب النفسي لـ القاهرة 24، أن مع بداية موسم الامتحانات لطلاب الثانوية العامة لابد من تجاهل عادة.. المراجعة بعد الامتحان، قائلًا: لازم ميأثرش فينا نتيجة الامتحان، لأن في شخصيات عُصبية بتقوم بمراجعة الامتحان لأكثر من 50 مرة، المادة الواحدة هي جزء من المجموع وليست كل المجموع، فـ نعديها ونحاول نعوض احسن في اللي بعده.
وقال الدكتور فرويز: لا داعي للبكاء على اللبن المسكوب.. ومش شرط نقفل ونجيب الدرجات النهائية، عصر الـ 100% خلاص انتهى ودلوقتي طب بتاخد من 90% عادي.
ونصح قائلًا: لازم الطلاب تاخد قسط كافي من الراحة، وتظبط مواعيد النوم، والتنفس.. ولما تلاقي نفسك متوتر اقعد وخد نفَاس الشهيق وانت مغمض عينيك لمدة 5 أو 10 دقايق، هتلاقي نفسك أحسن.. انت معاك وقت كافي للمراجعات والمذاكرة.
الابتعاد عن المقارنات والنقد
وأضاف: انك تطلع من مادة وتدخل على مادة تانية تلاقي نفسك ناسي كل حاجة قبل المراجعة ده طبيعي نتيجة التوتر، لكن مع تمرين تنظيم النفَاس هتلاقي الدنيا فرقت معاك.
وتابع الدكتور فرويز أن للأسرة دور فعٌال في الدعم النفسي للطالب، مؤكدًا: لا داعي لقيام الأسرة بـ اللوم.. انت جاوبت وحش، انت فاشل، شوف ابن خالك.. لابد من الابتعاد عن المقارنات والنقد، على الأقل حاليًا مع أيام الامتحانات.
وأوضح أن لابد من توفير الهدوء مما يساعد على تحسين نسبة تركيزهم، والابتعاد عن الانشغال بالمشكلات الشخصية أو الحياة اليومية، واختتم قائلًا: بالإضافة إلى الابتعاد عن نسبة الدهون العالية في الوجبات الغذائية، والتركيز على شرب العصائر وضبط مواعيد النوم.
