شيرين عبد الوهاب عن أزمتها مع روتانا: رافعين عليّا قضايا وموقفين شغلي.. وواثقة في نزاهة قضاء بلدي
كشفت الفنانة شيرين عبد الوهاب، تطورات أزمتها مع شركة روتانا، مشيرة إلى أن عملها متوقف بسبب هذه الأزمة.
وقالت شيرين عبد الوهاب في تسجيل صوتي لـ القاهرة 24: برغم إن المحكمة حكمت إن عقدي انتهى مع روتانا، لكنهم لسه رافعين قضايا وموقفين الدنيا كلها، وواثقة في نزاهة فضاء بلدي.
شيرين عبد الوهاب عن أزمتها مع روتانا: رافعين قضايا عليّا وموقفين شغلي
كما علقت شيرين عبد الوهاب، على التسجيلات الصوتية المسربة من قبل طليقها حسام حبيب، مؤكدة أنها بالفعل تتعرض لظلم من قبل شقيقها محمد عبد الوهاب.
وقالت شيرين في التسجيل الصوتي لـ القاهرة 24: بأكد إن كلام حسام مظبوط وفعلًا أخويا باعني ومحمد شاعر مستولي على السوشيال ميديا بتاعتي بتوكيل كنت عملته ليه قديم، وكل الكلام مظبوط.
وأضافت: أنا مش بحب أتكلم عن المشاكل الشخصية دلوقتي علشان ما أشغلش حد ومحدش يقول مش ورانا غير شيرين ومشاكل شيرين، لكن لازم تعرفوا إن فيه أغاني حلوة جدا مع الموزع توما وعزيز الشافعي ومدين، لكن فيه حاجات بتخلص علشان فيه مشاكل مع الشركة المنتجة، لأن فيه حد بشخصه قاصد يقعدني في البيت وبنخلص الحاجات دي، والأغاني هتنزل وهتعجبكم، ومش عاوزاكم تصدقوا أي حاجة من محمد عبد الوهاب، ولما الأغاني تنزل هتعجبكم، وحسام مشكور إنه بيرد بالنيابة عن أهلي.
وأكملت شيرين: آسفة اني بشغلكم بأخبار لكني اضطريت لأني صحيت لقيت السوشيال ميديا مقلوبة ومش عاوزة أضايقكم بأي أخبار عني سواء حلوة أو وحشة، لأني عارفة إن كل واحد عنده هموم ومشاكل وصدقوني مش قصدي بالدليل إني كنت ساكتة ومش بتكلم في أي تصريحات، لكن أنتم أهلي وأثبتوا ليا كدة وبتردوا غيبتي وبتقفوا ليا غير كدة ما تصدقوش أي إشاعات أو أكاذيب.
