أحمد عيد عن أزمة القمة: المنظومة محتاجة وقفات كثيرة ومحدش بيتحرك
علق أحمد عيد عبد الملك المدير الفني لفريق غزل المحلة، على أزمات الكرة المصرية الفترة الأخيرة، بعد غموض مصير مباراة القمة المقبلة بين الأهلي والزمالك.
أحمد عيد عبد الملك: منظومة الكرة محتاجة وقفات
كتب أحمد عيد عبد الملك عبر حسابه الرسمي على موقع فيسبوك: عن نفسي كمدير فني صاعد مع فريق للدوري الممتاز، قاعد يتفرج على الساحة الرياضية ومفيش خريطة محطوطة لأي حاجة جاية، ولا لنهاية الدوري الحالي أو بداية الدوري الجديد.
وتابع: ولا عارف تتكلم على صفقات مع لاعيبة الدوري اللي لسه مخلصوش علشان تتعاقد معاهم، ولا عارف تحط بداية فترة الإعداد بالظبط إمتى وهتفضل لحد إمتى تعمل الإعداد دا، وإحنا مخلصين دوري من أول إسبوع لشهر مايو هنستني 5 شهور مثلًا علشان نلعب رسمي.
وشدد: الصراحة الجو العام ميساعدش أي حد يعرف يشتغل وينجح، بقالنا 4 سنين في نفس المشاكل، نفسي الدوري علي الأقل يرجع لحقبة بداية الألفية الجديدة، ملاعب كامل العدد ومواعيد متظبطة وفرق جماهيرية موجودة في الدوري تضيف حلاوة وقوة وإثارة للدوري.
وأضاف: أنا عمال أحلم بس هنعمل إيه؟ ما باليد حيلة والكرة حاليًا بقت وسيلة لحاجات كتير أوي الأغلب بيستخدمها غلط.
واختتم أحمد عيد عبد الملك: منظومة محتاجة وقفات كتيرة وكبيرة ومحدش بيتحرك، مستنين الحل من عنده وربنا يسترها على القادم.
يذكر أن مجلس إدارة نادي الزمالك أعلن رفضه خوض أي مباراة في الدوري، إلا بعد استكمال النادي الأهلي لقاءاته المؤجلة في المسابقة.
