أحمد حلمي: عادل إمام قدوتي ومستحيل حد يكسر أرقامه.. وعمري ما عملت أغنية برا عمل درامي
تحدث الفنان أحمد حلمي، عن الزعيم عادل إمام، مؤكدًا أنه قدوته بالمسرح، بجانب حديثه عن أغنياته التي أوضح أنه لم يقدم أي أغنية خارج عمل سينمائي.
وقال أحمد حلمي، خلال لقائه مع برنامج ET بالعربي: أنا قدوتي في المسرح الزعيم عادل إمام، يعني ده بالنسبة لي يعني إيه مسرحية تقعد 5 سنين ومسرحية تانية تقعد 8 سنين و11 سنة، إزاي الجمهور مخلصش؟ المفروض يخلص، محدش هيقدر يكسر الرقم القياسي بتاع الزعيم.
وتابع أحمد حلمي: كل الأغاني بتبقى جوا الأعمال، وعمري ما عملت أغنية برا عمل درامي من أول ميدو مشاكل وعملت حوالي 5 أفلام ورا بعض فيهم أغاني، وبعد كده وقفت شوية لأني لقيت أن العمل مش محتاج وبعدين رجعنا تاني نعمل أغاني في الأفلام لأنها بتبقى حاجة لذيذة وبتبسط الجمهور.
أحمد حلمي: كنت خايف من مواجهة الجمهور بعد غياب 23 سنة عن المسرح
كما كشف أحمد حلمي، تفاصيل تحضيرات مسرحيته ميمو، برفقة المستشار تركي آل الشيخ، وعودته للمسرح مرة أخرى بعد 23 عاما، قائلًا: المستشار تركي آل الشيخ، قالي المسرحية 10 أيام، أنا أعرف أن المسرحية 5 أيام مثلًا لكن 10 إزاي، وقالي اسمع الكلام وهنعرض في المسرح الكبير، وأنا أترعبت وكنت خايف من مواجهة الجمهور وجه لوجه، أو أن الجمهور ميجيش أو يجي أول يوم وميجيش تاني يوم، وبعد العرض قالي شوفت قولتلك، وطلعنا عملنا جولة السعودية وعرضنا حوالي 30 يوم في السعودية، وطلبت منه أعرض في مصر، وطبعًا رحب جدًا وبيطمن كل شوية أخبار الجمهور إيه.
