شقيق ضحية حادث دهس التجمع: المتهم كان ماشي بسرعة ودخل بشوكة اللودر في الميكروباص
حصل القاهرة 24 على نص تحقيقات القضية 8789 لسنة 2024 في واقعة سائق اللودر المتهم بالتسبب في وفاة موظف وإصابة آخرين، بعد دهسه سيارة ميكروباص بمنطقة التجمع الأول بالقاهرة.
حادث دهس شخص باللودر في التجمع الأول
واستمعت جهات التحقيق لأقوال شقيق المجني عليه وجاءت كالآتي:
ج: اللي حصل إني جالي تليفون النهاردة الصبح مفاده إن أخويا شريف يحيى توفي إلى رحمة مولاه أثناء توجهه إلى عمله في التجمع وأثناء استقلاله الميكروباص اصطدام لودر بالميكروباص بالشوكة الخاصة باللودر وإن أخويا توفي على الفور وعليه توجهت لقسم الشرطة وهناك عرفت إن سواق اللودر ده كان عايز يهرب ولكن الشرطة قامت بضبطه.
س: متى وأين حدث ذلك؟
ج: أنا المعلومة وصلتلي النهاردة حوالي الساعة 9 صباحًا وأنا في شغلي.
س: من كان برفقتك؟
ج: أنا كان معايا زمايلي في الشغل.
س: وما مضمون المعلومة التي وصلت لك؟
ج: أنا وصلي إن أخويا وهو راكب ميكروباص الشغل عمل حادثة ولودر خبطه ومات.
س: وهل وقفت على تفاصيل ذلك الحادث؟
ج: لا.
س وهل أبصرت الواقعة؟
ج: لا.
س: وكيف وقفت على ما حدث؟
ج: من الناس اللي كانوا موجودين في مكان الحادثة.
س: وما الذي أخبروك به تحديدًا؟
ج: هم قالولي إن سواق اللودر ده كان ماشي بسرعة مرعبة ودخل بالشوكة بتاعته في الميكروباص وأخويا توفي على الفور ده غير إن فيه مصابين كمان.
س: وهل وقفت على سرعة المتهم؟
ج: لا.
س: ما المعلومات بشأن الواقعة؟
ج: عرفت إن الشوكة بتاعة اللودر دخلت فيه ومات ساعتها على طول.
م: وهل نتج عن ذلك الحادث ثمة إصابات بآخرين؟
ج: أيوة.
س: أين يتواجد باقي المصابين؟
ج: هم في مستشفى النسائم.
س: وأين كان مجلس شقيقك بالسيارة تحديدًا؟
ج: هو كان قاعد جنب السواق.
س: وهل حاول المتهم مساعدة شقيقك؟
ج: لا.
س: وهل نكل عن مساعدته؟
ج: أيوه هو بعد ما الحادثة حصلت هو حاول يهرب بأنه يخرج الشوكة من الميكروباص وفعلًا طلع جري وبعدين الشرطة قبضت عليه.
س: وهل تتهم المتهم فتحي.ع بأي اتهام؟
ج: أيوه أنا بتهمه بالتسبب بخطأ في وفاة شقيقي والنكول عن مساعدته.
س وهل من سابق معرفة أو خلافات فيما بينك وبين المتهم؟
ج: لا.
ويذكر أن محكمة جنايات القاهرة المنعقدة بالتجمع الخامس، قضت بمعاقبة سائق اللودر المتهم بالتسبب في وفاة موظف وإصابة آخرين، بعد دهسه سيارة ميكروباص بمنطقة التجمع الأول بالقاهرة، بالسجن سنتين مع الشغل.
