باسم ياخور: الكوميديا تراجعت.. والممثل اللي مفيش أدوار بتستفزه يبقى انتهى
كشف الفنان السوري باسم ياخور، سبب عدم رغبته في تكرار التجربة الكوميدية مرة أخرى، بجانب الكشف عن إمكانية دخول نجله الوسط الفني خلال الفترة المقبلة.
وقال باسم ياخور، في تصريحات تليفزيونية: معنديش رغبة حاليًا إني أجسد أدوار كوميدية خاصة أن الكوميديا تراجعت جدًا، والكوميديا ليها شرط واحد وهو غير مطلوب حاليًا على المنصات والمحطات، والتوجه العام توجه مختلف، وإحنا للأسف مضطرين نواكب التوجه العام مع مؤسسات كبيرة بتاخد الدراما وهي بتحدد إجمالًا إيه النوعية اللي لازم يتم إنتاجه.
وتابع باسم ياخور: بحن لأيام الماضي في بلدي سوريا، كانت أيام حلوة ووضع البلد كان مختلف، وكل حاجة كانت أبسط من دلوقتي، كل ما بتمر سنة كل ما الأمور بتبقى معقدة، الحياة كانت أبسط وكنا مبسوطين أكتر.
وعن الشخصية التي يتمنى تقديمها خلال الفترة المقبلة، فعلق باسم ياخور: الممثل اللي مفيش أدوار بتستفزه حتى لو هو عامل أهم شيء في حياته المهنية بيكون انتهى، وأي شخصية أي كان نوعها الممثل ممكن يشتغل عليها من جديد ويطلع منها مادة حلوة.
أما عن إمكانية دخول نجله الوسط الفني، فأوضح باسم ياخور: ابني مالوش اهتمامات فنية، والحقيقة هو مركز في دراسته ويقرر اللي عايزه في حياته واللي هو بيحب يعمله، وإذا كان له اهتمامات فنية يومًا ما ممكن أساعده ولكن مش هقوله يعمل إيه أو ميعملش إيه، وهو مالوش اهتمامات بالشهرة ودي حاجة أنا بحبها فيه.
كما أكد باسم ياخور، أنه حريص للغاية خلال استخدامه تطبيق تيك توك، قائلًا: دخلت التيك توك من 3 سنين، ولو عدينا الفيديوهات اللي نزلت طوال الـ 3 سنين ممكن يطلعوا 20 فيديو، وأنا مبعملش لايف على تيك توك ولا بدخل في تحديات التيك توك، وقليل جدًا لما بدخل على التيك توك.
