شجار بأسلحة بيضاء.. عيد ميلاد التيك توكر مريم الحركي يثير الجدل.. وأحد الحاضرين: دخل علينا بلطجية
تصدر حفل عيد ميلاد التيكتوكر مريم الحركي التريند على مواقع التواصل الاجتماعي، بعدما أثار جدلًا واسعًا على منصات السوشيال ميديا نتيجة ما انتهت إليه تلك الليلة من أعمال عنف ومشاجرة بين الحاضرين.
عيد ميلاد مريم الحركي يثير جدلًا واسعًا على السوشيال ميديا
وأكد أحد الحاضرين بعيد الميلاد في تصريحات خاصة لـ القاهرة 24 أن الحفل كان بـ فيلا في منطقة التجمع، والتنكر بملابس وإطلالات شعبية حسب رغبة التيكتوكر مريم الحركي صاحبة الحفل، وبمرور وقت الحفل ظهرت الأسلحة البيضاء في أيادي بعض الحاضرين.
وقال واصفًا ما حدث في حفل عيد ميلاد مريم الحركي التيكتوكر الشهيرة، بأنه حدث شجار بين 2 من الحاضرين للرقص بسلاح أبيض وسط أجواء عيد الميلاد الشعبية.
شجار ينتهي بواقعة بلطجة.. عيد ميلاد مريم الحركي
وأردف تصريحاته قائلا: ومن هنا بدأت الخناقة والمشادات والألفاظ الخارجة، حاولنا نلمّ الدنيا عشان عيد الميلاد.. وصاحب الواقعة اللي تم الاعتداء عليه قال: أنا آسف يا جماعة ده سوء تفاهم واحنا هنحل الموضوع مش عايز أي حاجة تقف بسببي، لكن فجأة 4 بلطجية دخلوا علينا الفيلا بأسلحة وأخدوه وضربوه وشرحوه في جسمه ووشه وكتافه الاتنين وظهره، ودمه كان على هدومنا كلنا.
واستكمل التفاصيل: الفيلا كانت مش متأمنة ومكنش فيه غير البواب وأسرته وصاحب الفيلا، ولما سمع التكسير والتخبيط بتاع البلطجية قالوا لنا يلا لموا حاجتكم وامشوا محدش يقعد.
وأضاف أن التيكتوكر الشهير صاحب الواقعة كان لا يحمل أي أسلحة بيضاء ولم يملك أي شيء فيها: كان جاي من غير أسلحة.. ومش معنى إنه قال هات أرقص بيها تبقى بتاعته، الشخص اللي اعتدى عليه هو اللي كان جايب الأسلحة البيضاء في الحفلة.
بلطجية دخلوا علينا.. شاهد عيان في عيد ميلاد مريم الحركي
واستكمل: مافيش أي حاجة غريبة وكان عيد ميلاد طبيعي، ولو كنا متجمعين في المكان بس بـ ملابس مختلفة محدش كان هيتكلم، وسبق وبلوجرز مشهورين عملوا نفس الاستايل بتاع ملابس الأحياء الشعبية في حفلاتهم ومحدش اتكلم عنهم.
وأكد: كل حاجة على السوشيال ميديا غلط.. محدش مات في الحفلة، ولا حد فقد الوعي من الضرب.. مفيش أي مواد مُخدرة كانت موجودة، ولا أي سلوكيات غير أخلاقية كانت بين الشباب والبنات، كل ده مالوش أي أساس من الصحة.
واستكمل: صاحب الواقعة مش عايز يكبر الموضوع وعايز يمشي قانوني، وراح عمل محضر وإثبات حالة بعد ما تم الاعتداء عليه، وإن شاء الله ربنا هيجيب له حقه من اللي ضربه وتسبب له في أذى.
