علاء مرسي عن انتقادات تقبيله يد محمد هنيدي: قصور في الفهم وهجوم مريض
تحدث الفنان علاء مرسي عن علاقته بالفنان محمد هنيدي، وسر الحب والصداقة بينهما، إلى جانب تعليقه على الهجوم الذي تعرض له بعد تقيبله يد هنيدي في فرح ابنته.
وقال علاء مرسي في لقائه مع برنامج كلام الناس: محمد هنيدي جزء مني وجزء من تاريخي وحياتي وجزء من العمر والسنين وأخويا اللي مش من أمي وأبويا، ولما نقعد مع بعض بننسى أننا بنشتغل ممثلين إحنا صحاب، وبغير عليه وبخاف عليه طول الوقت وعاوز أشوفه ناجح وفي مكانة أعلى وأعلى.
وأضاف علاء مرسي: هنيدي ربنا إداله سر أنه يمسك مفتاح في صناعة السينما وكان أحد الرواد اللي فتحوا الباب بفيلم ودور وغير شكل الكوميديا، هنيدي فتح الباب لأجيال جت بعده وهو الباب الرئيسي، ومش حكاية موهبة أو سر دعوة والدته ولكن ده من حبه لمهنته وإخلاصه وهو عنده إيمان أنه يكون حاجة مهمة في شكل معين.
وأكمل علاء مرسي: حبه ليا لأني مرايته، وممكن أقوله مش عاجبني كذا أو رافض كذا ولما بشوفه بفرح ولما بتقابل معاه بيحصل لي حاجة غريبة لأني بكون مشتاق له ومش بنشوف بعض كتير تقريبا لأنه بياسفر وعنده أعمال بره، وأنا شوية بيتوتي، لكن الخط مفتوح بينا طول الوقت وبحس به لما بيتعب وهو كمان ببحس بيا وإحنا شيء واحد وهنيدي حاجة عظيمة وبحبه جدا.
قصور في الفهم وهجوم مريض
وعن انتقادات تقبيل يده قال: بيفسروها دايما بشكل شخصي بمعنى يقول لك هو باس إيده، علشان هنيدي يرضى عنه ويشغله ولأنه بيتودد لهنيدي، وده قصور في الفهم وهجوم مريض، الحكاية أكبر من كده، والموضوع كله أن الحالة دي مش بتحصل بينا كتير على فكرة، ولما بنتقابل بسلم عليه عادي، لكن فرحتي ببنتي وفرحتي بالفرح، وتجربة إني أحس إني هجوز بنتي، خلتني في حالة عجيبة جدا ودي أول مرة وبنتي الكبيرة وجزء مني فاللي يجي لبنتي أشيله على دماغي وده للغريب، وهنيدي فاجأني لأنه لآخر لحظة عارف أنه مش هيحضر لأن عنده شغل ومسافر، والمشاعر دي مسموح بيها بين الأحبة والأصحاب لكن أنا معنديش مصلحة.
وواصل علاء مرسي: أنا مؤمن تماما أن ربنا مديني فوق ما أتمنى ومديني راحة بال وولاد فرحان بيهم، وعندي نِعم أنا نفسي مش عارف أعدها، وأنا بسعى بالطرق اللي أتربيت عليها وفي عزة في الطلب، وأنا مش بعمل تصرف يعبر عن محبتي علشان هدف خالص والناس فهمت كده وهاجمت وده العادي.
