أسماء جلال: اشترطت أقدم رقاصة محترمة في فيلم ولاد رزق 3
استضافت الإعلامية منى الشاذلي الفنانة أسماء جلال في برنامجها معكم المذاع عبر قناة أون، وتحدثت عن كواليس مشاركتها في فيلمي اللعب مع العيال وفيلم ولاد رزق 3 ضمن موسم أفلام عيد الأضحى.
وقدمت منى الشاذلي أسماء جلال قائلة: أسماء جلال بابتسامة جذابة وبوجه يحوذ القبول لا إراديا بطلة محببة لكل الناس بتقوم ببطولة فيلمين من اللي بيتعرضوا في الموسم ده وأكبر فيليمين وبقيت اسم مش بس مطلوب إنتاجيا، ولكن كمان أي مكان بتتواجد فيه سواء بشكل فني أو شخصي فيديوهاتهم بتتشاف كتير وتحليلات من الجمهور.
أسماء جلال تتحدث عن مشاركتها في اللعب مع العيال
وقالت أسماء جلال عن كواليس مشاركتها في اللعب مع العيال وولاد رزق: اشتغلت مع شريف عرفة في اللعب مع العيال واتعلمت البدوية، ومثلت مع محمد إمام وكمان ولاد رزق مع طارق العريان بصراحة مبسوطة جدا الحمد لله.
وأضافت عن التعاون مع شريف عرفة: شريف عرفة أكتر إنسان قابلته عارف هو عاوز إيه بيقول كات على المشهد اللي هياخده في المونتاج لكنه مش بيختار كذا شوت ويفكر فيهم.
وتابعت: وأكتر حد ذكي في توجيه الممثلين والسيطرة على اللوكيشن بكل هدوء وكل ذكاء ومفيش حد بيعلي صوته في اللوكيشن والناس كلها بتحترمه والناس كلها بتيجي في مواعيدها.
وأكملت: شريف عرفة عامل دريس كود معين ودي حاجة أنا اكتشفتها لأنه بيتعامل مع الاستوديو إن ده المكان اللي بتنتمي له فلازم نحترمه ولو رايح شغلك فتلبس حاجة مناسبة ما ينفعش تيجي بشورت او شبشب حتى لو الجو حر في الصحراء انت لازم تحترم شغلك، وكان في حد لابس شورت فكلمه بلطافة وفهمه.
أسماء جلال تتحدث عن مشاركتها في ولاد رزق 3
كما تحدثت أسماء جلال عن مشاركتها في فيلم ولاد رزق 3، وقالت: أنا بحب ولاد رزق الأجزاء اللي فاتت ولما طارق العريان كلمني على الجزء ده تحمست جدا وقلت له أنا موافقة، وأنا اشتغلت مع عمرو يوسف قبل كده في مسرحية وهو حد لذيذ أوي والطاقة بتاعته حلوة.
وأضافت عن تقديمها دور راقصة: فكرنا الشخصية دي تكون إيه هل رقاصة، فأنا قلت له لأ مش عاوزة، قال نصابة؟ قلت تمام او رقاصة محترمة الرقاصة اللي بتلبس توب تحت بدلة الرقص.
وأكملت عن شخصية عمرو يوسف في الفيلم: ربيع بيعمل كل حاجة غلط ولكن مش عارفة أمسك عليه حاجة بس حاسة وفي الحقيقة ممكن أي واحدة يضحك عليها، شاكيرا نفسها اضحك عليها.
