حكايات محكمة الأسرة| زوجة تقاضي زوجها: جوزي بيجبرني أكلم رجالة عشان الفلوس.. وأخرى: بيحب واحدة فضائية من المريخ
تشهد محاكم الأسرة بمختلف مواقعها، مناوشات وتبادل اتهامات بين الأزواج والزوجات، ويحاول كل طرف الانتصار واسترداد حقوقه، لنشاهد ونسمع العديد من القضايا والتفاصيل والحكايات الغريبة ومنها غير الواقعية؛ بسبب الخلافات بين الزوجين، والتي تصل للجوء إلى العنف والوقوف داخل أقسام الشرطة.
سيدة في دعوى نفقة: زوجي بخيل وبيجبرني أكلم رجالة عشان يحولولي فلوس
أقدمت سيدة على رفع دعوى نفقة ضد زوجها بمحكمة الأسرة، بعد زواج دام لسنوات أنجبت خلاله 3 أولاد، بسبب بخل زوجها وإجبارها على الحديث مع أشخاص آخرين، قائلة: زوجي بخيل وبيجبرني أكلم رجالة عشان يحولولي فلوس.
وقالت الزوجة: كنت بتكلم في جروب بيجمع رجالة وستات على أحد البرامج وكنا بنرغي مع بعض وكل واحد بيقول مشكلته مع زوجته أو زوجها، وكنت بحكيلهم إن زوجي بخيل عليا ووحش معايا وكانوا بيبعتولي عملات كنت بحولها لفلوس واستلمها.
وتابعت الزوجة: بعد فترة جوزي شافني مجمعة فلوس كتير من الرجالة دي والبرنامج وبقيت ميسورة الحال فطلب مني إني أقعد على الأبليكيشن فترة أطول، وأكلم الناس أحكيلهم مشاكلي عشان يبعتولي فلوس أكتر مع العلم إن زوجي مرتاح ماديًا ولكنه بخيل.
وأردفت الزوجة: كنت في الفترة دي مبقتش عايزة أعمل أي حاجة حرام وعايزة أبطل الموضوع ده، ولكن كان بيجبرني إني افتح وأكلم الناس ومن هنا قررت أرفع دعوى نفقة وأبعد عنه.
رشا لـ قاضي الأسرة: جوزي بيحب واحدة فضائية من المريخ
زواج دام 4 سنوات بين رشا ومحمد انتهى بـ خلع داخل محكمة الأسرة، بعد أن طلبت الزوجة خلعه قائله: فاكر نفسه كائن فضائي، وطلب من الترزي يفصل له ملابس فضائية عشان يروح المريخ يتجوز البنت اللي بيحبها.
بدأت قصة رشا ومحمد بزواج عن حب، وأنجبت منه بنتًا، وفي آخر عامين من الزواج، بدأت الزوجة تلاحظ حدوث أفعال غريبة من زوجها قائلة: طوال النهار والليل بيتفرج على أفلام فضائية، ولما سألته ليه قالي أنا بحب واحدة من الفضاء وهتجوزها، وأنا لازم أسيبك عشان بحبها.
وأضافت الزوجة، أنها اعتقدت أنه يمزح معها، ولكن تحول الموضوع بشكل جدي، وترك العمل وبدأ في تحضير حقيبته ليجهز للذهاب إلى كوكب المريخ، مستكملة: قالي إن الفضائيين طلبوا منه يجهز نفسه.
وأردفت الزوجة أنها لم تحتمل هذا الأمر وطلبت منه الذهاب لدكتور نفسي مرارا، موضحة: كان بيقولي أنتي مش شايفة الكائنات قاعدين حوالينا في كل مكان، وأنا بحب البنت الفضائية وهتجوزها عليكي.
