وكيل أحمد رفعت: والدته شافت موت ابنها مرتين.. وهذه كواليس أزمته الأخيرة
قال نادر شوقي وكيل الراحل أحمد رفعت لاعب نادي مودرن سبورت، إن والدته مرت بظروف صعبة للغاية خلال الفترة الماضية بسبب أزمة نجلها.
تصريحات وكيل أحمد رفعت
وقال نادر شوقي في تصريحات تليفزيونية: أحمد رفعت كان على قوة نادي مودرن سبورت خلال الإدارة السابقة، وتم إعارته لنادي الوحدة الإماراتي، وكان لا يحق له الخروج خارج البلد قانونا، وكان لازم يخرج بتصاريح واتقال إن فيه تصاريح اتعملت، التصاريح دي متعملتش، فلما سافر، وكان قاعد قلقان، وعرف إن موقفه في السفر غير قانوني.
وأضاف: فريق مودرن سبورت كان عنده ماتش في إفريقيا، وسافر مع فيوتشر وسافر من الترانزيت على الإمارات، وفوجئ إن الموضوع غير قانوني واتقاله ارجع، وبعد كده نادي الوحدة عرفه إن فيه مشكلة في السفر، وإنه مش مركز وعايزين يفسخوا العقد، وفسخنا العقد فعلا، وقعد شهر في الإمارات مش بيلعب كورة، ورجع القاهرة، وقالي أنا مش عايز أعمل حاجة غير قانونية.
وواصل: كنت قاعد بقالي سنة بقول يا جماعة حلوا القصة، لحد ما رفعت وقع، كنت عايز أحمد رفعت يلعب 10 دقائق بس مرة تانية بعد أزمته الصحية، عشان ميبطلش كرة غصب عنه.
وأتم تصريحاته قائلا: أنا حصلت على فلوس رفعت كلها من نادي الوحدة لما عرفوا كل حاجة، عشان ناس محترمة، محدش تدخل خالص عشان يحل أزمة أحمد رفعت، وأحمد لما اختفى مكنش مصاب، وحس بالظلم، ورفعت مكنش بيحب يخش في المشاكل، ووالدة أحمد رفعت شافت موت ابنها مرتين مش مرة واحدة، وكانت بتكلم ناس عشان تتوسلهم يحلوا المشكلة، بس كان لازم القانون يتنفذ.
