بسمة داود تكشف كواليس مسلسل الوصفة السحرية: قدمت نهلة بصورة المحجبة الشيك
تحدثت الفنانة بسمة داود عن كواليس مشاركتها في مسلسل الوصفة السحرية، والذي جسدت فيه دور نهلة، وظهرت خلاله مرتدية الحجاب.
وقالت بسمة داود في لقائها مع القاهرة 24 إنها قدمت دور السيدة المحجبة الشيك والتي تهتم بنفسها وأسرتها، مضيفة: نهلة بالنسبة لي شخصية حسيت إني عاوزة أعملها وبدأت أشتغل عليها كلها، لأن فيها تفاصيل حلوة خاصة لما قرأت مشاهد نهلة وحسيت إنها حقيقية، وحاولت إنها تكون محجبة وجميلة وشيك مش مهملة في نفسها وبتاخد بالها من بيتها زي أختك وأختي والناس اللي بنشوفها، ومفيهاش أي حاجة مختلفة ولكن كمان هي مش عادية لكن الناس شايفة أنها عادية.
وواصلت بسمة داود: أنا كنت بشخصن كل حاجة ليها علاقة بنهلة، ولما كان بيتقال نهلة العادية بتعصب جدًا، هي مش عادية لأنها عملت كل اللي عليها، وده ميخليهاش عادية وعملت كل حاجة حلوة فالناس خدتها أن ده العادي.
واختتمت: كان فارق معايا إنها تكون طبيعية لحم ودم وتحسيها صاحبتك وشبهك وبتضايقي ليها وأنا أختي محبجة ولذيذة ومحجبة وأمورة وبتشتغل وكل حاجة في حياتها مظبوطة، وده ميخلهاش عادية ولا يخليها مقصرة في شكلها، والحجاب مش واخد من جمالها ودي كانت حاجة مهمة بالنسبة لي.
