شمس البارودي تكشف سبب وتفاصيل اعتزال حسن يوسف.. فراق الابن أم الاكتفاء؟
كشفت الفنانة المعتزلة شمس البارودي، تفاصيل اعتزال زوجها الفنان حسن يوسف، الفن نهائيًا، طالبة من جمهوره احترام وتقدير قراره بالاعتزال، مؤكدة أن أنباء تعرضه لوعكة صحية عارية تمامًا من الصحة.
سبب اعتزال حسن يوسف الفن
وتحدثت الفنانة شمس البارودي، لـ القاهرة 24، عن سبب اعتزال الفنان حسن يوسف، مؤكدة أن اعتزاله الفن نهائيًا بسبب حزنه على وفاة نجله الصغير عبد الله، قائلة: الراجل أعلن اعتزاله خلاص وأنتم مش فاهمين أن إحنا في حالة حزن واللي مش حاسس باللي إحنا فيه ربنا يصيبه بما أصابنا، يعني أنا بقول ربنا يصيب اللي هما مش حاسين باللي إحنا فيه، إحنا فاقدين ابننا في إيه يعني؟.
وتابعت شمس البارودي، عن اعتزال حسن يوسف: ربنا يصبرنا وده واحد قال أنه اعتزل عشان هو مش قادر خالص يمارس أي حاجة بعد وفاة ابنه ومش عايز يرد عليكم وده حقه، دي حاجة غريبة جدًا.
واستكملت شمس البارودي: في ناس بيحصل لهم حاجات كده وبيعدوها ويمشوا يمارسوا حياتهم عادي إحنا مش عارفين نمارس حياتنا عادي خلاص، يعني إحنا بندعي أن ربنا يحفظ لينا أخوات عبدالله، وبنترحم على عبدالله وعايشين حياتنا كده في هدوء وسكينه مش عايزين أي نوع من أنواع الصحافة الشوشرة تعبنا.
حسن يوسف يتحدث عن اعتزاله
وسبق وأن تحدث الفنان حسن يوسف، عن اعتزاله الفن، موضحًا أنه يعيش حالة من الحزن على فراق نجله عبدالله، ولكنه على الرغم من ذلك إذا عُرض عليه سيناريو جيد سيتخذ خطوة العودة، قائلًا: أنا الحمد لله بخير وكويس، وبعد وفاة ابني الغالي عبد الله أخدت القرار فورا؛ لأن الوجع اللي جوايا وجع الابن ربنا ما يكتبه على حد خلاني مقدرش أقدم أدوار اللي الناس تعودت تشوفني فيها، وأنا لسه جوايا الوجع ده.. مقدرش أقول غير الحمد لله، دلوقتي أنا مشغول بالقراءة ولو اتعرض عليّا عمل معنديش شرط غير إنه يكون ورق وأجر كويس إذا كان هيبقى فيه، لكن غير كده مفيش شهية للشغل.
آخر أعمال حسن يوسف
ويعتبر مسلسل الضاهر، الذي عرض عام 2019، هو آخر أعمال الفنان حسن يوسف قبل اعتزاله الفن، والذي دارت أحداثه حول ضابط في الجيش يعيش بمنطقة الضاهر ويحظى باحترام من حوله بسبب مساعدته لهم ومواقفه الطيبة معهم، حتى يرتبط بعلاقة حب مع فتاة يهودية ويقع في الكثير من المواقف خلال أحداث الحلقة، وشاركه في بطولة العمل كلًا من: الفنان محمد فؤاد، فريال يوسف، تامر عبد المنعم، علاء مرسي، علاء زينهم، مادلين طبر، والعمل من تأليف تامر عبد المنعم، وإخراج ياسر زايد.
