عملوا عليا حفلة بالمطاوي.. ننشر أقوال البلوجر بيسو المعتدى عليه في عيد ميلاد مريم الحركي
تصدر حفل عيد ميلاد التيكتوكر مريم الحركي التريند على مواقع التواصل الاجتماعي، بعدما أثار جدلًا واسعًا على منصات السوشيال ميديا، نتيجة ما انتهت إليه تلك الليلة من أعمال عنف ومشاجرة بين الحاضرين.
عيد ميلاد التيكتوكر مريم الحركي
وحصل القاهرة 24 على نص التحقيقات في القضية، وجاءت أقوال البلوجر بيسو المجني عليه أمام جهات التحقيق كالآتي:
اللي حصل إن أنا يوم 20 يونيو 2024، جاتلى دعوة من واحدة صديقتي اسمها مريم الحركى، وطلبت إنى أروح أحضر عيد ميلادها في فيلا شرق الأكاديمية بالتجمع الأول، والدعوة كان فيها إن شكل العيد ميلاد كأنه فرح شعبي، وطلبت الحضور بلبس شعبي، والدعوة جاتلي على الواتس آب بتاعي قبل العيد ميلاد بـ 3 أيام، قولتلها مش هقدر آجي فأقنعتني إني أروح.
وأضاف البلوجر بيسو في التحقيقات: يوم 29 يونيو روحت على العنوان علشان أحضر عيد الميلاد لوحدي، وأول ما دخلت لقيت مجموعة شباب معرفهمش بيبصولى وبيشاوروا لبعض عليا، ومكنتش أعرف هما بيبصوا عليا ليه، وبعديها بشوية حد جه خبط في كتفي، ورجع تاني علشان يبينلي إنه خابطني قصد، وأنا معملتش حاجة وقولت دا ممكن يكون متسول، فسكت ومعملتش حاجة.
وتابع: بعد شوية جالي واحد تاني معرفش اسمه، إداني كازلك قالي خد اتصور بيه، قولتله لا مش عاوز اتصور بيه، قالي خلاص مش هصورك بس خدة أرقص بيه، وأنا مسكته قعدت أبص علية كده لأني أول مره أمسك حاجة شبهه کده، وبعدين لقيت واحد من الشباب الي كانت واقفه جالي وبيشد الكازلك من ايدي، وبيقولى دا بتاعى قولتله الولد ده هوا اللي اداهوني قام خده مني غصب وقالي ابقي قول للي ادهولك محمد عبدون خدو مني.
وتابع البلوجر بيسو أمام جهات التحقيق: بعديها قررت إن أنا همشي وأسيب المكان علشان معجبنيش الناس اللي موجودة، لأنهم معظمهم كانوا ماسكين مطاوي وكازالك، وبعد كدا قولت أمشى، وأنا خارج لقيت واحد اسمة سيف نصير شوفته قبل كدا، وعارفه من التيك توك، برده جالي وبيقولى أنت بتكلمه كدا ليه يا وحش، قولتله أنا متكلمتش معاه أصلا وإحنا رجالة بنتكلم مع بعض، فجیت أمشى لقيت سيف بيوقفني وبيقولي اتكلم كويس ومحمد عابدون طلع سلاح عبارة عن سلاح ذراعه صغير أسود، والسلاح نفسة لونه بني، وبعد كدا لقيت ناس كتير اتلمت عليا، وكانوا واقفين ورا سيف ومحمد عابدون جه عليا بالسلاح، وضربني في كتفي وسيف نصير ضربني برجله في جسمي، وأربع أفراد تانین معرفهمش واحد منهم رمى عليا كرسي والتاني كان بيلف ويديني بالرجل.
وأردف المجني عليه في عيد ميلاد مريم الحركي: بعد كدا وأنا جوا جاتلى البنت اللي اسمها مريم الحركي، وقالتلي بوظتوا العيد ميلاد، وكان في ناس تانية جوا العيد ميلاد كانوا عايزين يحاولو يطلعوني من العيد ميلاد، بس الشباب واقفين برا ومش راضيين يطلعوا حد، وبعد كدا حد من الموجودين قالي اغسل وشك علشان كان في جرح في وشي وذراعي وبطني، وبعد كدا قولت لحد من الموجودين نحاول نحل الموضوع وخلينا نتكلم.
وأكمل: بعد كدا لقيت واحد اسمه سيف الدين عشماوي صابغ شعرة أصفر وكان أول مرة أشوفه في الواقعة، ودا جالى يقولي أحسنلك متطلعش بره قولتله هات الشباب بس نحل وقالي لا خليك هنا وبعد كدا طلع وجالي 8 بيهجموا على العيد ميلاد 6 منهم بأسلحة بيضاء، عبارة عن أربع مطاوي وكازلكين، وبعد كدا لقيت ولد كان لابس تيشرت أحمر في ازرق وقعني على الأرض، فأنا حاولت أروح وأجرى منهم، الولد اللي كان لابس تيشرت أحمر فى أزرق رماني على الأرض والـ 8 اتلفوا عليا وكلهم كانوا عمالين يضربوني بالرجول والمطاوي والكازالك، وكان في نظرة غل فى عينيهم بقولهم كل اللى بتعملوه دا مش صح، ومستنى حد ييجي يدافع عني.
واختتم: بعد دقيقتين سيف عشماوى كان ماسك مطواة بيلوح بيها، وضربني بيها في دماغي وفضلت على الأرض والعيال كلها جريت وركبوا العربية وهربوا، وبعد كدا خدونى على المستشفى ورحت عملت محضر.
وقضت محكمة جنح التجمع المنعقدة بالتجمع الخامس، اليوم الأربعاء، بالحبس سنتين للمتهم في واقعة التعدي على التيك توكر حسن بيسو في واقعة حفل عيد ميلاد البلوجر مريم الحركي، كما قضت بالحبس 6 أشهر لمتهم آخر.
