بشرى تشيد بفيلم أهل الكهف: نموذج للفرق بين الفيلم الأورجانيك والمصنوع جيدا.. ومش واخد حظ أخواته الكبار
أشادت الفنانة بشرى بفيلم أهل الكهف، بطولة الفنان خالد النبوي، والفنانة غادة عادل، الذي يعرض حاليا في دور العرض السينمائي.
بشرى تشيد بفيلم أهل الكهف
ونشرت بشرى صورة لها عبر حسابها الشخصي بموقع فيسبوك، مع بوستر الفيلم من السينما وعلقت عليها قائلة: ليه لازم نشوف فيلم أهل الكهف؟ أنا مش هقدر أتكلم وأفسر كتير لأن الكلمة دلوقتي وهي حق أصبحت خطر على حياة الإنسان، بغض النظر عن الفيلم حلو ولا لا أو يعجبك ولا لا الخلاصة أنك لازم تروح تشوفه.
وأضافت بشرى: أنا شخصيا عجبني فيه حاجات كتير واحترم المجهود البصري وأداء الممثلين والملابس والموسيقى بس الأهم من ده كله أنه مش معمول له نفس بروباجاندا الآخرين، يعني بالبلدي مش واخد حظ أخواته الكبار رغم إن الفيلم كبير وصناعه كبار، لكن هو نموذج للفرق بين الفيلم الأورجانيك والفيلم المصنوع جيد صحيح بس صناعة الدعاية هي الأساس فيه.
وأكملت بشرى: على صعيد آخر دعم الفيلم ده يرجع أمجاد شبه دعم القطن المصري كدة في أيام عزه قبل ما يبقى قطن فقط للتصدير، لقد أصبحت السينما والفنان منتج للتصدير فا لو عندنا منتج محلي نجح ينافس في عز المقاطعة رغم افتقاده لبعض التاتشات السحرية بتاعة الإمبريالية ولزوم البروباجاندا، يبقى لازم وواجب الدعم مش فقط لكينونة الفيلم نفسه، أو لشخص صناعه بس المصيبة اللي هتيجي بعد كدة لو استمرت هذه الأيديولوجية وهي أما الفيلم يكون مصبوغ بصبغة البروباجاندا الإمبريالية أو كأنك يا أبو زيد ما غزيت.
واختتمت بشرى حديثها قائلة: نفسى مرة نلحق البلا قبل وقوعه، والله العظيم بنشرب ازوزة محلي وتمام ولسه عايشين، ونقدر كمان نعيش من غير ازوزة خالص، فما بالك بقى لو كمان العمل متعوب فيه؟ مش هيبقى في قيمة مضافة لو ظل المنتج للتصدير يا متعلمين.
أبطال فيلم أهل الكهف
ويضم فيلم أهل الكهف مجموعة من النجوم منهم خالد النبوي، وأحمد عيد، وغادة عادل، ومحمد ممدوح، ومحمود حميدة، ومصطفى فهمي، وصبري فواز، وهاجر أحمد، وريم مصطفى، ومحمد فراج، سيناريو وحوار أيمن بهجت قمر، إخراج عمرو عرفة.
