هايدي موسى: بحاول اخرج من شخصية البنت الناعمة.. وأنا مُقصرة في التمثيل
تحدثت المطربة هايدي موسى، عن خطتها الفنية خلال الفترة المقبلة، موضحة أنها تعمل على الخروج من شخصية الفتاة الناعمة التي عرفها بها الجمهور، بجانب حديثها عن إمكانية دخولها عالم التمثيل.
هايدي موسى: بحاول أعمل خطة لتقديم حاجات متنوعة خلال الفترة اللي جاية
وقالت هايدي موسى، في تصريحات لـ القاهرة 24: بحاول أعمل خطة لتقديم حاجات متنوعة خلال الفترة اللي جاية، علشان المقاييس بقت مختلفة شوية عن زمان، وأنا كنت محطوطة في قالب معين وبحاول أخرج منه، أني البنت اللطيفة الهادية الناعمة أوي، فأنا قولت لأ يا جماعة إحنا موجودين وعملنا أغنية على الفبريكة، والحمد لله الناس حبتها.
وعن إمكانية دخولها عالم التمثيل، علقت هايدي موسى: أنا مُقصرة جدًا في التمثيل ومبسعاش ليه خالص، وكل سعيي ناحية شغفي وأنا في الفن بشغفي، ودي حاجة مش صح بصراحة، مش بروح للحاجة اللي ممكن تعملي انتشار أكبر، بحب التمثيل بس مجتليش الفرصة اللي تخليني أطلع الموهبة بشكل كامل، كان نفسي من زمان أعمل ميكس بين أني بمثل وبغني ودي مش سهل نلاقيها، وأتمنى الفترة اللي جاية أركز.
هايدي موسى تعلق على شائعات زواجها
كما علقت المطربة هايدي موسى، على شائعات زواجها، قائلة: الجواز شيء طبيعي وحلو وحلال ربنا وفرحة، وأول ما يحصل ويكون في حاجة رسمي الناس هتعرف بيها.
كما كشفت هايدي موسى، عن المواصفات التي تتمنى وجودها في زوجها المستقبلي: أنا مركزة على الجوهر وأنه يكون سند وأمان ليا، ولغة الحب بتاعتي هي الأفعال، وأكتر حاجة بتشدني أنه يكون راجل بجد يخاف عليا ويكون مصدر طمأنينة، ولازم يقدرني ويقدر موهبتي، طبيعي يكون ليه تحفظات زي أي راجل شرقي، بس يكون داعم ليا في شغلي، وأنا مش هرضى أنه يكون في وضع مش مرتاح فيه.
