ناديت عليه وقلتله القاضية ممكن.. أفشة يهدي قميصه لفتاة بعد هدفه الثالث في بيراميدز
أهدى لاعب النادي الأهلي محمد مجدي أفشة فانلته، والتي كان يرتديها في مباراة بيراميدز مساء أمس الجمعة لفتاة أقصرية كانت تشجع النادي، وتشجعه بحماس من المدرجات وتحثه على النزول لإحراز القاضية وهدف الفوز بالمباراة.
أفشة يهدي قميصه لفتاة بعد مباراة الأهلي وبيراميدز
وقالت الفتاة الأقصرية لـ القاهرة 24: أنا اسمي ناردين إيهاب عبد المسيح من مدينة الأقصر وعندي 25 سنة - طب أسنان، وبشجع النادي الأهلي من وأنا عندي 4 سنين، والأهلي ده قصة عشق كبيرة عن بابا وعيلته كلهم.
وأضافت ناردين: أنا بخلص الامتياز بتاعي في القاهرة ودايما بحب أروح ماتشات الأهلي، والنهاردة كنت في المدرجات والماتش كان صعب فناديت على أفشة قولتله أنزل والقاضية ممكن، فسمعني وشاورلي وضحك إنه مش هينزل لسه.
وواصلت ناردين: بقيت انده على كولر وأقول كولر - أفشة، كولر - أفشة علشان يفهم إنه المفروض ينزل أفشة، وبقى المدرج ينده معايا وبالفعل خلاه يسخن وبقيت أنده عليه وأقوله القاضية ممكن، وعاوزه التيشيرت فضحك وشاورلي بعد الماتش.
وأكملت ناردين: بالفعل نزل أفشة وجاب الجول بالقاضية زي ما قولت له، وبعد الماتش جالي المدرجات وقلع التيشيرت ورماه ليا.
ونشرت ناردين على صفحتها قائلة: تي شيرت صاحب القاضية في بيتنا، حقيقي خلاني مبسوطة إنه سمع تشجيعي لما قعدت أشجعه وأقوله هتجيب جول ويلا هات قاضية تاني وكان بيشاورلي، وجه بعد الماتش إداتي الـ T-shirt بتاعه، جماعة أنا مبسوطة بشكل مش عارفة أوصفه.
فوز مثير لـ الأهلي
وحقق الأهلي فوزًا مثيرًا على فريق بيراميدز بـ 3 أهداف لهدفين خلال المباراة التي جمعتهما مساء أمس الجمعة، باستاد القاهرة في اللقاء المؤجل من الجولة الـ14 لبطولة الدوري الممتاز، وسجل أهداف الأهلي، وسام أبو علي (هدفان) ومحمد مجدي أفشة هدف، فيما سجل هدفي فريق بيراميدز فيستون ماييلي وأحمد سامي.
وارتفع رصيد الأهلي بهذه النتيجة إلى 60 نقطة جمعها من 24 مباراة ويحتل المركز الثاني، فيما تجمّد رصيد بيراميدز عند 68 نقطة جمعها من 28 مباراة.
