أول اعتذار من أسرة اللاعبة.. عاصم ابن عم شهد سعيد: بنعتذر لجنة وبنت عمي لم تقصد إصابتها
تقدمت أسرة شهد سعيد لاعبة منتخب مصر لـ الدراجات باعتذار إلى جنة عليوة زميلتها في المنتخب، وذلك بعدما دفعتها بعنف خلال أحد السباقات ما تسبب فى إصابتها، وألحق بها أضرارًا صحية ونفسية.
وقال عاصم ابن عم شهد سعيد، في تصريحات خاصة لـ القاهرة 24: بنعتذر لـ جنة عليوة على اللي حصل، وبنت عمي مقصدتش إنها تصيبها خلال السباق.
شهد سعيد: حاولت الاعتذار لـ جنة أكتر من مرة ورفضت
وتحدثت شهد سعيد لاعبة منتخب مصر للدراجات في وقت سابق، عن أزمتها مع اللاعبة جنة عليوة، واحتمالية استبعادها من بعثة منتخب مصر المتوجهة إلى أولمبياد باريس 2024.
وقالت شهد سعيد: أنا ما خبطهاش عن قصد، أنا اختل توازني وخبطتها من غير ما أقصد، وهي اللي شتمتني مش أنا اللي شتمتها، وفوجئت إن الإسعاف خدتها، وهي عملت لي محضر، ورحت القسم والنيابة، وحاولت أعتذر لها، وهي ما وافقتش، وأختها عارفاني كويس جدا.
وفي تصريحات خاصة لـ القاهرة 24، أشارت شهد سعيد، إلى أنها حاولت الاعتذار لـ جنة عليوة أكثر من مرة لكنها رفضت، لافتة إلى تعرضها لحالة نفسية سيئة بسبب الانتقادات التي تعرضت لها خلال الأيام الماضية وأنها منقطعة عن الأكل منذ 3 أيام.
وأضافت: أنا مكنش قصدي وبعترف إني غلطانة، لكن ده خطأ غير مقصود وعن غير عمد، وحاولت اتواصل مع جنة عليوة أكثر من مرة ورفضت تتكلم معايا، وأيضًا المدرب حاول التواصل معاها ورفضت.
من جانبه، قال وجيه عزام رئيس اتحاد الدراجات: الموضوع له شقين، فيه أوقات كتير جدا بيكون فيه احتكاك بين اللاعبين وبنفترض في كده العمد وبيحصل تحقيق، ووزير الرياضة داخل في هذا الموضوع بقوة معانا ومتفهمين، وبيتم إعادة النظر في سفر شهد سعيد من عدمه، والأميل إنها مش هتسافر أولمبياد باريس 2024 لكن رسميًا القرار هيكون قرار دولة.
جنة عليوة بالتحقيقات: شهد سعيد دفعتني بإيدها علشان زمايلها يكسبوا السباق
فيما قالت جنة عليوة لاعبة منتخب مصر أمام جهات التحقيق: اللي حصل إني كنت في سباق الماراثون وفوجئت بدفعي من قبل المشكو في حقها المدعوة شهد سعيد محمد بإيدها، وهي من الفريق المنافس.
وأضافت: عملت كده علشان اللي كان جاي ورايا 2 من فريقها علشان يكسبوا السباق، ووقعت واصطدمت بالنيوجيرسي بالطريق، واتصبت وهو ده كل اللي حصل، وأنا بتهمها بالتسبب في حدوث إصابتي.
