اليوم.. محاكمة سائق أوبر المتهم بخطف ومحاولة الاعتداء على فتاة التجمع
تنظر محكمة جنايات القاهرة، اليوم الأحد، أولى جلسات محاكمة سائق أوبر المتهم بخطف نبيلة عوض، المعروفة إعلاميا بـ فتاة التجمع، ومحاولة اغتصابها بنطاق منطقة مدينة نصر، خلال استقلالها السيارة معه، لتوصيلها من منطقة التجمع الخامس للشيخ زايد.
محاكمة سائق أوبر المتهم بخطف نبيلة عوض فتاة التجمع
وحصل القاهرة 24 على التحقيقات في قضية فتاة التجمع، والتي حوت الاعترافات الكاملة لـ سائق أوبر المتهم، وجاءت كالآتي: أنا أعمل سائق وأقيم بمركز أبشواي بمحافظة الفيوم، ولي محل إقامة آخر بالمقطم محافظة القاهرة، واللي حصل إن أنا شغال عند المهندس ش.ز، سواق بالعربية اللي أنا مأجرها من الفيوم عنده في كمبوند بالتجمع الخامس، وبعد ما بخلص شغل بشغل أبلكيشن أوبر عشان أعمل كام رحلة أجيب مصاريف البنزين بتاع العربية، عشان أوفر فلوس المرتب اللي باخده عشان بصرف على نفسي وأسرتي.
وأضاف سائق أوبر المتهم في واقعة فتاة التجمع: بعد ما خلصت شغل شغلت الأبلكيشن لقيت رحلة كمبوند بجوار الجامعة الأمريكية، وقريب مني متجه إلى الشيخ زايد، فقبلت الرحلة وأنا في الطريق كلمت الشخص اللي بيتواصل معايا على الشات بتاع الأبليكيشن ومكنتش فاهم هي بتقول إيه، فبعتلها الرقم بتاعي عشان تكلمني عليه، وكلمتني ووصفت المكان بالضبط، وروحت وأنا داخل الكمبوند وقفني الأمن وقلتلهم أنا أوبر وأخد الرخصة مني وبعتلها إن أنا وصلت على الشات بتاع الأبلكيشن وبعدها بدقيقتين هي نزلت وركبت ومشيت، وبعد ما طلعت من الكمبوند ركنت على جنب عند البوابة ونزلت أجيب الرخصة وأخدتها ومشيت.
وتابع المتهم باختطاف وهتك عرض فتاة التجمع في اعترافاته: وأنا في الطريق قلت لها الحساب بتاع الرحلة ظاهر إنه فيزا وطلبت منها إن تحولها ليا كاش أو على البرنامج بتاع إنستا باي، فقالت الرحلة بكام وأخدت التليفون مني تسجل الرحلة على برنامج أوبر حاجة اسمها العميل، وبعدها لقيتها بتقول لا أقف على جنب ونزلني فركنت فلقيتها كانت فتحت الباب ونازلة، فقولتلها طيب هاتي التليفون بتاعي فلقيتها واخداه ونازله فبطلت العربية وشديته من إيدها فقامت هي شداني من وداني اللي فيها السماعة اللي أنا بسمع بيها، فكنت أخدت منها التليفون وشديت منها السماعة فاتقطعت في إيدي أنا وهي، وبعد كده نزلت وسابت الباب مفتوح.
وأردف سائق أوبر المتهم في اعترافاته: لقيت بعدها عربيتين ملاكي واحدة وقفت أمامي وواحدة خلفي، فأنا مشيت وقفلت الباب بايدي وأنا ماشي، وبعد كده روحت على الشقة اللي أنا ساكن فيها في المقطم ونمت وتاني يوم نزلت روحت الفيلا عند المهندس ش، اللي أنا شغال عنده وبعدين لقيت ك.أ، اللي شغال معايا عند المهندس.ش، سواق في الشركة بيكلمني وبيقولي إن فردة الكوتش بتاعت العربية اللي معاه بايظة، وهو واقف عند بنزينة موبيل اللي عند ميدان بتاع مفيدا اللي في شارع التسعين في التجمع وروحت عند البنزينة ووقفت وبطلت العربية لقيت المباحث قبضوا عليا وروحنا القسم وجيت على النيابة، وهو ده كل اللي حصل.
