عالم أزهري: وسائل التواصل الاجتماعي يستخدمها البعض لنشر الفاحشة وهذه مصيبة
حذر الشيخ أبو اليزيد سلامة، من علماء الأزهر الشريف، من المداومة على المعصية، لافتًا إلى أن هذا الأمر يجعل رصيد الستر ينفد.
وقال سلامة، خلال تصريحات متلفزة اليوم: علشان رصيدك في الستر لا ينفد، علشان مينكشف عنك ستر ربنا، إياك أن تداوم على المعصية بشكل يجعلك تبقى مدمنًا عليها، واحذر أن تختبر المولى سبحانه وتعالى وتقول: إن ربنا هيسترني.
وأضاف: سيدنا عيسى عليه السلام، لما جاءه إبليس وقال له: مش انت مؤمن بربنا، قاله: أنا مؤمن بربنا، قال له: طيب، اطلع إلى أعلى مكان في الجبل وارمي نفسك، وبالتأكيد مش هيحصلك حاجة لأن ربنا هيحفظك، فأجابه سيدنا عيسى: إياك أن تختبر الله يا لعين، إن الله يختبرنا ونحن لا نختبره، ولا يكون إلا ما قدر الله.
وتابع: إشاعة الفاحشة أصبحت سهلة جدًا في حياتنا مع وجود وسائل التواصل الاجتماعي، بأدنى صورة الإنسان ممكن يفضح أي شخص، ومن الممكن أنه يتلصص على أي شخص، ويتجسس عليه.
أبو اليزيد سلامة: النظر لعورات الناس يكشف ستر ربنا عنك
واستطرد: المشكلة إن بعض الشباب دلوقتي بيعمل مصيبة كبيرة جدًا وهو مش واخد باله، وتحسبونه هينا وهو عند الله عظيم، فكرة إن انت ممكن تكون وقعت في معصية وكلنا بنقع في المعصية، لكن إن انت تيجي يوم من الأيام تنشر لنفسك على فيسبوك إن أنت امبارح عملت كذا وتصور نفسك وانت بتعمل هذا الأمر وتنشره، دي مصيبة كبيرة جدًا.
