والدة طالبة تستدعي الشرطة بعد طرد ابنتها من المراجعة النهائية في الغربية
شهدت مدينة طنطا بمحافظة الغربية واقعة غريبة، عندما طرد مدرس طالبة ثانوية عامة شعبة علمي علوم من حصة المراجعة النهائية في مادة الأحياء قبل يوم من الامتحان بسبب طلب الأخيرة تحريك مروحة لشعورها بضيق بالتنفس.
الحصة بـ500 جنيه
وأوضحت طالبة الثانوية العامة بمدينة طنطا أن حصة المراجعة النهائية في مادة الأحياء بـ 500 جنيه وبمجرد طرد المدرس لها من حصة المراجعة النهائية، اتصلت بوالدتها التي حضرت على الفور لحجرة الدرس وطلبت من المدرس دخول ابنتها لمتابعة المراجعة النهائية، إلا أن المدرس رفض وعلى إثر ذلك استدعت والدة الطالبة شرطة النجدة.
تفاصيل طرد مدرس لطالبة من المراجعة النهائية للأحياء
ونشرت شهد صابر طالبة الثانوية العامة بمدينة طنطا بمحافظة الغربية، تفاصيل طردها من حصة المراجعة النهائية في مادة الأحياء قائلة: النهارده كنت بحضر مراجعة مستر عبد اللطيف الجمل، اللي عملها في مقر مستر التطاوي واتهزقت واتطردت من غير سبب مفهوم لحد دلوقتي، القصة إن لسبب أجهله التكييفات في المكان مش بتجيب أي هوا ومشغلين مراوح برضو مش عاملة فرق مع العدد، وأنا عندي حساسيه صدر وأنف، وكنت قاعدة في آخر القاعة وجنبي مروحة واقفة مش سقف، فالمروحة كانت محطوطة جايبة هوا عليا وعلي اللي حواليا وكنت تمام، دقايق ولاقيت البنت اللي ورايا شدت المروحة وخلتها حرفيا مش بتجيب هوا على أي حد غير صفها.
وأكملت طالبة الثانوية العامة بطنطا: عشان مطولش عليكم حصل كلام بيني وبين مساعدة المدرس أنها تعدلها تاني، لقيتها تنحت ومردتش، المستر قال في إيه ورا قالتله بسبب المروحة، قال لها اقفليلي المروحة دي خالص وشيليها، قولتله بعد إذن حضرتك أنا بتخنق من قله الهوا ومش هينفع، قاللي: " متكتريش في الكلام معايا، كررت كلامي أني بتخنق قالي برضو متكتريش في الكلام وقال لها شيليها يا مس وشالتها فعلا.
وأردفت طالبة الثانوية العامة بطنطا: وأنا بدأت اتخنق فعلا من قله الهوا وكان باين عليا، فالمستر قاللي " لو مش عاجبك وعايزه تمشي أمشي"، وفعلا شيلت حاجتي في هدوء ومشيت، وأنا طالعه سمعته بيقول خلي المس تكلم ولي أمرها ومتجيليش تاني.
وتابعت: المهم أني طلعت وكلمت والدتي وأخويا والاتنين جم عشان يكلموه، أمي دخلت له تقول له يدخلني ويتكلموا بعد الحصة عشان الحصة متضيعش عليا طردها هي كمان مع إن والدتي زميلته في المهنة والدتي مديرة مدرسة الإمام الشافعي، معتقدش إني محتاجة اعرفها، الكل عارف أمي شخص عامل إزاي.
وواصلت طالبة الثانوية بطنطا: أمي طلبت الشرطة والمستر كمل زعيق حتي بعد ما الشرطة جت، وقال: "أنا مقصرتش معاها طول السنة ولما كانت بتبعتلي أسئلة كنت بجاوبها حتى على الواتس".
