هنا الزاهد: مفقتدة مشاعر الأبوة رغم وجود والدي.. وطلعت زكريا حاول يملى الفراغ ده
تحدثت الفنانة هنا الزاهد عن افتقادها لمشاعر الأبوة رغم وجود والدها، مشيرة إلى أنها كان منشغلا عنها طوال الوقت بسبب انشغاله بعائلته الثانية.
وقالت هنا الزاهد خلال لقائها في برنامج صاحبة السعادة: والدي موجود وناس كتير فاكرة أن هو مش موجود وكان في فرحي، بس هو مش قريب مني خالص وكان نفسي يكون قريب وزمان كنت بخاف أعمل مشاكل في المدرسة علشان لما يجيلي استدعاء ولي أمر ماما هي اللي هتيجي وأنا عايزاه هو اللي يجي عشان أقولهم ده بابا، محدش يقدر يعملي حاجة ده يبهدلكم والحتة دي مكنتش موجودة.
وأضافت: لما كنت في فرح بنت صلاح عبدالله وشفته وهو بيعيط وفرحان أنا وقفت علي جنب كده وفضلت أعيط اوي قولت أنا الإحساس ده عمري ما حستيه كان نفسي أحسه.
وأكملت هنا الزاهد: بحاول أكلمه هو إنسان كويس جدا لكن هو عنده عيلة تانية ربنا يخليهم له وربنا يخلوهولي هو في الآخر أبويا بس انا افتقدت أوي مشاعر الأب معرفش يعني اي أب اصلا.
وأشارت هنا الزاهد إلى إنها لا تنجذب لمن هم في عمرها، بسبب عدم وجود والدها في حياتها، وقالت: بحس إن اللي في سني أخواتي أكتر، أنا عايزة حد يحتويني أكتر أنا مش قادرة أن أنا اللي أحتوي بس لا أنا عايزة اللي يحتويني ويبقي ضهر وسند أبقي حاسه بأمان، الأمان ده حاجه كبيرة أوي، وبابا شخص جميل وبيسأل علينا من وقت للتاني بس انا مبشوفهوش خالص أنا كان نفسي لما أحب حد أروح أقوله ده كويس ولا لا طب أعمل إيه كان نفسي أوي أعيش الاحساس ده، إلى الآن مفتقده مشاعر الأب وعلشان كده خايفة من فشل الزواج وطلعت زكريا حاول أن يملي الجزء ده.
هنا الزاهد تكشف تعرضها للتنمر بسبب صوتها
كما تحدثت هنا الزاهد عن تعرضها للتنمر بسبب صوتها في بداية مشوارها الفني، أول ما بدأت في التمثيل اتعرضت للتنمر بسبب صوتي ورغم كده تامر حسني شايف أني لازم أغني وفي فيلم بحبك كان في أغنية هنغنيها مع بعض ولكن فشلت في الاختبار والناس كلها قالت له مش هينفع.
