وليد صلاح عبد اللطيف لـ القاهرة 24: الزمالك محتاج 7 صفقات.. وهذه توقعاتي للأولمبي
أكد وليد صلاح عبد اللطيف نجم الزمالك السابق أن الأهلي حقق الفوز أمام بيراميدز ضمن مباريات الجولة من مسابقة الدوري المصري الممتاز بسبب الجماهير التي ساندته في ستاد القاهرة الدولي.
تصريحات وليد صلاح عبد اللطيف
وقال وليد صلاح عبد اللطيف في تصريحات لـ القاهرة 24: بيراميدز كان الأقرب ولكن الحالة الفنية لبيراميدز في المباراة أمام الأهلي كانت على غير العادة، بالإضافة لجمهور الأهلي اللي ساعد في فوز الفريق بشكل كبير، لو بيراميدز كان لديه جماهير كانت المباراة اختلفت كتير.
وأضاف وليد صلاح عبد اللطيف: الزمالك بعيد عن المنافسة على الدوري بسبب الظروف، وسيبدأ من جديد في الموسم المقبل، بسبب التدعيمات والصفقات الجديدة اللي هتيجي هتضيف للفرقة، دلوقتي مسألة وقت وتجارب لـ جوميز دلوقتي للاستقرار على اللاعبين والناشئين اللي هتكمل معاه.
وعن رأيه في جوميز مدرب الزمالك، قال وليد صلاح عبد اللطيف: مدرب كويس، أحيانا بيكون ليه بعض الأخطاء، مثل وضعه للاعبين في غير أماكنهم، ولكن في المجمل مدرب كويس إذا توفر له لاعبين على مستوى عالي.
وعن الصفقات الذي يتمناها في الزمالك، قال عبد اللطيف: لاعبو الدوري كلهم متقاربون، مفيش فوارق كبيرة، لازم اللاعب اللي هتجيبه يكون كويس وشخصيته قوية، عارف يعني إيه نادي الزمالك وعايز يثبت نفسه، وتكون إمكانياته عالية، بالإضافة إلى التركيز في أماكن اللاعبين التي يحتاجها الزمالك، وأتمنى يكون المهاجم من الخارج ويكون لاعب كبير.
وأكمل وليد عبد اللطيف: لازم يكون فيه تدعيمات في الفريق كويس، الزمالك محتاج 6 أو 7 لاعبين على الأقل في الموسم المقبل.
وعن منتخب مصر الأولمبي، قال عبد اللطيف: جهاز فني جيد، وفريق جيد، كنت أنادي بأن اللاعبين من غير إضافة الكبار، محمد صلاح بس اللي كان يروح غير كده المفترض إعطاء فرصة للاعبين اللي ساهموا في الوصول إلى الأولمبياد، نفسهم يحترفوا ويتشافوا، بمشاركة اللاعبين الكبار هيمنعوا ده.
وأتم: أتمنى يكون في عرض مشرف للمنتخب، هنعرف هنا بقى نشوف اللاعب الدولي اللي يمثل مصر في المنتخب الأول ويحترف.
