جلال الزكي بعد الحادث ورحلة العلاج: كنت بسأل ربنا هل هقف تاني على رجلي.. وهرجع أشتغل بقوتي ولا لأ
تحدث الفنان ومدير التصوير جلال الزكي عن خروجه من المحنة التي تعرض لها مؤخرًا بعد تعرضه لحادث سير مروع، كاشفًا التساؤلات التي كانت تخطر في باله بعد الحادث.
وقال جلال الزكي في أول لقاء له بعد تعافيه مع القاهرة 24: كل لحظة في التجربة الصعبة دي الواحد بيحس بكل المشاعر، بيحس أنه الحمد لله عايش وبتنفس وفي نفس الوقت كنت بسأل ربنا هل هقف تاني على رجلي بعد كل التكسير واللي حصل ده؟، طيب لو وقفت هرجع اشتغل ولو اشتغلت هرجع تاني بقوتي وبكامل إحساسي وطريقتي وأسلوبي وناسي.
وأضاف جلال الزكي: وبسأل نفسي يا ترى هيكون ليا مكان تاني في الشغل ولا لأ، لأنك لما بتعطل عن الشغل شوية ولما بتغيب شوية زي ما في ناس حلوة في ناس وحشة كتير ممكن يقول لك مش هيقدر يقف على رجله أو جاله ارتجاج في المخ أو سافر بره يتعالج الناس بتكون متلغبطة فيه منهم حلو وفيه وحش.
وكشف الفنان جلال الزكي أنه رغم أن التجربة التي مر بها كانت قاسية لكنه تعلم منها الكثير، مشيرًا إلى أن لطف الله كان يحيط به طول الوقت قائلًا: ربنا كتب لي عمر جديد وكان معايا طول الوقت، واتعلمت إن القدر لما بينزل بيكون معاه لطف ربنا، وبالرغم من أنها تجربة قاسية إلا أنها مهمة في حياتي وبحمد ربنا عليها الحمد لله.
وكان الفنان جلال تعرض لحادث أليوم في منتصف شهر مايو الماضي، بعد انقلاب سيارته وإصابته على طريق الواحات بمدينة 6 أكتوبر بالجيزة، بعد عودته من العمل إذ كان يصور مشاهد من عمل جديد في أحد مواقع التصوير.
