محمد صبحي: الفن مينفعش يكون منزوع منه الفكر والرسالة.. والإضحاك فقط قلة أدب
أكد الفنان محمد صبحي، أن الترفيه جزءًا أساسيًا من الفن، ولكن لا يجب نزع الفكر والرسالة منه، موضحًا أن الأعمال التي يتم تقديمها خلال الفترة الحالية خالية من الأهداف والرسائل التي من المفترض أن يقوم بها العمل الفني.
وقال محمد صبحي، في تصريحات تليفزيونية: اللي بيقطع تذاكر دلوقتي وبيدخل سينمات إن مكانش شيء تافه مش هيدخله، الفن جزء أصيل فيه الترفيه، لكن لو منزوع منه الفكر والرسالة مش هيفيدني في حاجة، في ناس بتقول الفن ترفيه وتفاهة وكفاية المتعة اللي بنحققها للمشاهد أنه بيضحك، لأ مبيضحكش، وعيب لما تقول أن قدراتك كلها علشان تضحك تبقى قليل الأدب، لأ أنت تضحك بمستوى أنت طالب تحققه في مجتمعك.
وتابع محمد صبحي: عايزين نقدم فن يرفع قيمة الإنسان، مبقولش نقول فلسفة ولا خطب، الناس بتصرخ من الضحك بس أنت عارف كيف تكتب الكوميديا لأن دي أصول، ولازم المؤلف يرجع تاني، وأنت مقعد المحترمين اللي بيفهموا وبيكتبوا وأثبتوا جدارتهم ونجوم سواء ممثلين أو مؤلفين أو مخرجين قاعدين في بيوتهم لأن دمهم تقيل، أنا راجل مبخافش، أنا بنتقد وضع سائد وكل الناس تتكلم عليه في السوشيال ميديا.
محمد صبحي: شركات إنتاج في مصر تعمل على التريند
وأضاف محمد صبحي: أنا بقول دوروا على الناس دول وتعالوا اشتغلوا، إنما لما بنت تطلع في التيك توك وتقول كلام سافل ومنحط بتشتغل في 4 و5 مسلسلات، وفي شركات إنتاج في مصر عايزة التريند، والكاميرات مبتروحش غير للتفاهات.
