عشان الناس تترحم عليها.. أول تعليق من أسرة الطالبة الراحلة بعد استلام رضيعها الجائزة في حفل تخرجها
أثار مقطع فيديو لـ الطالبة الراحلة مي جلال من حفل تخرج دفعتها من كلية الحقوق بجامعة الزقازيق 2024، وتقدم رضيعها لاستلام جائزة تكريم أمه نيابة عنها بعد وفاتها، تعاطف آلاف من رواد مواقع التواصل الاجتماعي.
أول تعليق من أسرة الطالبة الراحلة مي جلال بعد استلام رضيعها جائزة التكريم في حفل تخرجها
قالت نور شقيقة الطالبة الراحلة في تصريحات خاصة للقاهرة 24، إن رغبتها الأولى والأخيرة الدعاء على روح الطالبة مي بالرحمة من قبل الجميع، قائلة: مي كانت طيبة وقلبها أبيض.
وأضافت: مي توفيت يوم 31 مارس في شهر رمضان الكريم، وقبل الوفاة كانت تعاني من أعراض نزلات البرد العادية، وكانت بتاخد الأدوية والعلاج والمضادات الحيوية في ميعادها، لكن في فترة نزفت فيها وفصيلة دمها كانت o- ودي فصيلة نادرة جدًا، لكن مش عارفين هل ده سبب الوفاة الرئيسي ولا لأ.
شقيقة الطالبة الراحلة: عايزه الناس تترحم عليها
وتابعت نور: أنا مش بفضل الظهور في الحفلات والتصوير، لكن روحت الحفلة مع محمد ابن مي عشان خاطرها لأنها هي اللي دفعت ثمنها وكانت حابة تشارك وتحضر مع أصدقائها.
وعبرت عن حبها الشديد لما ظهر في مواقع التواصل الاجتماعي، قائلة: أنا عايزة الناس تترحم عليها، وتفضل الصورة حلوة عن مي لأنها كانت فعلًا جميلة وطيبة وتستحق كل خير.
وعن ابن الطالبة الراحلة: محمد على طول معانا كلنا ومفرقناش، وشوية معانا وشوية مع والده، مي اتوفت وهو رضيع عنده 6 شهور، وقبل الوفاة اشتريت له روب للتخرج وكانت فرحانة بيه جدًا، عشان كده أنا حبيت أكمل لها حاجة هي كانت مبسوطة بيها.
رضيع يتسلم جائزة تكريم أمه خلال وفاتها
والجدير بالذكر أن حفل التخرج لدفعة كلية الحقوق جامعة الزقازيق 2024، كان بالأمس حيث ظهرت نور شقيقة مي جلال الطالبة الراحلة، تحمل الرضيع وتتقدم لاستلام الجائزة، بعد أن ألقت إحدى المسؤولات عن حفل التخرج كلمة نعي للطالبة قبل الاستلام، قائلة: في معانا حد مهم جدًا.. لو مش حاضر بجسمه وقلبه، فهو حاضر بـ روحه، نقدر نقول عليه الغائب الحاضر.
واختتمت: السنة دي فقدنا زميلة عزيزة من دفعة حقوق 2024، أكيد كنا بنتمنى تشاركنا في حفلة التخرج لكن إرادة ربنا كانت أرحم بكتير، ويشاء القدر أنها تحتفل بردو لكن في مكان أحسن بكتير، ربنا يتولاها برحمته ويعوض شبابها في الجنة، ويعوض أسرتها بإذن الله.. سيتسلم الجائزة طفلها محمد هاني بنيابًة عن والدته.
