كريم كريم يكشف تفاصيل تأجيل حفل بلونديش في مصر بعد حملات المقاطعة
كشف الممثل الشاب كريم كريم، تفاصيل تأجيل حفل المغنية والـ DJ الكندية بلونديش في مصر بالساحل الشمالي، وذلك بعد حملات المقاطعة بسبب دعمها للاحتلال الإسرائيلي.
وقال كريم كريم، في مقطع فيديو عبر حسابه الشخصي بموقع انستجرام: ده فيديو انتصار ولكن مش انتصار كامل، لأن الحفلة اتأجلت ولسه متلغتش، ولكن بالتاريخ كده لما حفلة تتأجل بالمنظر ده بيبقوا عايزين يعززوا المغنية فمبيعلنوش الإلغاء علشان يحافظوا على كرامتهم، الشركة المنظمة نزلت أن الحفلة اتأجلت.
كريم كريم: الحفلة كانت هتبقى حفلة إسرائيلية على أراض مصرية
وواصل: الحفلة اللي كانت جاية مصر دي اسمها Abracadabra، اللي فيها بلونديش شريكة، وشريكة بلونديش طلعت إسرائيلية رسمي، يعني الحفلة اللي كانت هتتعمل دي كانت هتبقى حفلة إسرائيلية على أراض مصرية، والقضية الفلسطينية قضية إنسانية قبل ما تكون قضية عربية أو دينية، وللمستقبل اللي مش معانا ضدنا، الحتة اللي في النص دي مش موجودة ومعناها أنهم ضدنا وخايفين.
وأردف: اللي حصل ده يوريكم أننا غاليين أوي وياريت منرخصش نفسنا تاني لـ ناس ميسوش، واللي ميعرفش بلونديش عملتلي بلوك ومنظمي الحفلة عملولي بلوك، اللي هطلبه منكم دلوقتي تبعتوا ليها إنها غير مرحب بيها في مصر، خلوا دي حملة أننا مش هنقبل أنها تيجي تحت أي ظرف.
مطالبات بإلغاء حفل بلونديش في مصر
تعرضت المغنية الكندية بلونديش، خلال الأيام السابقة لهجوم شديد من قبل مستخدمي مواقع التواصل الاجتماعي، بعد أنباء إقامتها حفلا في القاهرة، خاصة أنها كانت داعمة كبيرة لجيش الاحتلال، كما أنها دائمة الهجوم على الشعب الفلسطيني.
