لاعب الاتحاد السكندري: تعرضت للظلم وتأذيت نفسيا.. وكان بيتطلب مني حاجات بتضرني
أثار فوزي الحناوي لاعب فريق الاتحاد السكندري، الجدل على حسابه الشخصي عبر مواقع التواصل الاجتماعي، بعد فسخ تعاقده مع زعيم الثغر لوجود أزمة مع بعض المسؤولين في النادي.
فوزي الحناوي: تعرضت للظلم وتأذيت نفسيا
وقال الحناوي على فيس بوك: أنا واحد مخدتش فرصتي كاملة عشان تحكم عليا، أنا واحد لما خدت فرصتي وبقيت ألعب كان بيتطلب مني حاجات معينة من المدير الفني بنفذها، وده بيضرني كواحد مهاجم وأرقامه قليلة، ولعبت في مراكز كتير في ماتشات كتير مش مركزي، ولكن أنا كنت تحت أمر النادي، وأي مدير فني محترم كان ماسكني وشاركت معاه أنا من أربع سنين لما كنت فري وببلاش عارف كدا، وأنا اللي جيت نادي الاتحاد عشان بحب النادي واخترته من قلبي، وأنا مسامح أي حد أذاني أو غلط فيا من جمهور النادي لإن ده من خوفه على النادي فده طبيعي عشان مش طول الموسم هيشجع ولا طول الموسم هينتقد، هي دي الكورة، فدايما جمهور الاتحاد على راسي مهما حصل، من أصغر واحد لأكبر واحد.
وأضاف: أنا عمري ما هسامح أي شخص أذاني الموسم ده، أنا تأذيت من كل حاجة، أنا نفسيا اتدمرت، من أول الموسم لما - شخص ما - قعد معايا عشان أنزل من عقدي وأنا رفضت عشان ده اللي اتفقت عليه من أول الموسم، ومن يوم ما رفضت والدنيا اتقلبت عليا من المدير الفني والأستاذ إ.ج، وقالي بالحرف اليوم ده وربنا الوحيد اللي يشهد على كل حرف أقوله، قالي إن النادي عايز ينزل من عقود اللاعيبة عشان بينزل بسقف الرواتب، ردي عليه كان إن عقدي مش كبير بس أنا موافق وتحت أمر النادي بس، لما تبدأ باللي عقدهم كبير وفيه أرقام كبيرة، وده طبعا ربنا يزيدهم ده رزقهم ومش هقول أرقام لإن دول إخواتي وفلوسهم هي فلوسي بس ده كان ردي.
وأكمل: أنا لعيب متربي في النادي الأهلي ومنتخبات المراحل بتاعتي كلها كنت موجود فيها وشاركت فيها، أنا مش لاعب وحش الحمد لله رب العالمين، أنا عندي موهبة وبحمد ربنا كل دقيقة عليها، ولكن الشخص ده عمره ما حب أي موهبة، بس أنا مش طالع أعلق شماعة ولا أتحجج بحاجة، بس أنا واحد اتظلم الموسم كله ومستاهلش كده، مستاهلش كده عشان بتمرن كويس وبحترم الصغير قبل الكبير وعمري ما عملت مشكلة، أنا طبيعي أطلع أبرأ نفسي من موسم صفري بالنسبالي عشان أنا في نادي جماهيري وده آخر موسم ليا مينفعش أسيبهم وفيه حاجه شايلنها جواهم من ناحيتي.
واختتم الحناوي: أنا دلوقتي لاعب حر وأتمني ربنا يوفقني وأمضي لنادي كويس أقدر أساعده ويساعدني، أنا آسف إني طولت بس كان لازم أقول بعض الحاجات اللي حصلت معايا عشان أنا كنت بتمرن ومصحف ربنا والدمعة في عيني، وأنا وحياة ابني اللي عمري ما هحلف بيه كدب متدمر نفسيا، وحسبي الله ونعم الوكيل من كل قلبي في أي شخص ظلمني، آخر حاجة أنا كان لازم أوضح بعض الحاجات اللي حصلت معايا، بس أنا ربنا عمره ما هيضيع تعبي ولا هيخذلني حتي وأنا لوحدي ومفيش حد في المجال كله واقف جنبي.
