الاعتماد مزور.. سيدة تحرر محضرًا ضد شركة سياحة: حجزنا رحلة للغردقة بـ23 ألف جنيه ونصبت علينا |خاص
تعرضت سيدة تُدعى ر.ي، لواقعة نصب، بعد أن اتفقت وزوجها ب.أ، مع إحدى الشركات السياحية، للحجز في فندق سياحي بمحافظة الغردقة، لتتفاجئ بعدم تأكيد الحجز وعدم صلة الفندق بالشركة، وتجاهل الشركة لها بعد دفع المبلغ الكلي للرحلة.
واقعة نصب جديدة بسبب شركة سياحة مضروبة
وشاركت ريهام يوسف، تفاصيل ما تعرضت له، في منشور على وسائل التواصل الاجتماعي، تشكو فيه من النصب عليها من إحدى شركات السياحة، بعد حجز رحلة سياحية في أحد فنادق الغردقة لمدة 4 ليالي، بتكلفة 23 ألف و600 جنيه.
وقالت ريهام يوسف في تصريحات خاصة لـ القاهرة 24: عايزة حقي وفلوسي بالقانون، والست اللي بتتواصل معايا هتاخد جزائها القانوني، احنا قعدنا طول السنة نحوش فلوسنا علشان خاطر الصيف، وفي الآخر شركة السياحة تنصب علينا.
وأضافت: البداية جوزي شاف عروض شركة للسياحة على منصات التواصل الاجتماعي وكان واضح إن عروضها جذابة وموفرة أكثر من الشركات الأخرى، ولما حجز معاها تواصلت معاه موظفة وقالت له إن التواصل عبر واتس آب، ومحتاجة 4000 آلاف جنيه لفتح الحجز، ودفع لها واستلم إيصال دفع باسم الشركة فقط، وبعدها بأيام قالت له إنها محتاجة المبلغ كله لتأكيد حجز الفندق.
صاحبة الواقعة: الفندق نفى أي تعاملات له مع الشركة
وتابعت: لما قال لها طب ننتظر تأكيد الفندق للحجز، قالت له بس كدة العرض هيضيع على حضرتك، ممكن تدفع المبلغ كله وأنا أتواصل مع الفندق وأجيب لحضرتك تأكيد نهائي بالحجز، ودفع لها المبلغ كله من خلال خدمة كاش حسب طلبها.
وأكملت: بعدها بأسبوع بكلم الفندق أتابع الحجز بتاعي، قال لي إنه لم يصل أي حجز باسم زوجي، وأن الشركة ليس لها أي تعاملات مع إدارة الفندق ولا تمت لهم بصلة، رجعت للشركة تاني قالت لي أنا لسة مأكدتش الحجز.
واستطردت: قلت لها أنا محتاجة اتواصل مع حد من إدارة الشركة، قالت لي مفيش حد تقدري تتواصلي معاه والتواصل متاح عبر واتس آب فقط، وطلبت منها ترجع لي فلوسي، لكن هي رفضت وقالت لي الحجز بياخد وقت عقبال ما يسمع، ولو هتاخدي الفلوس هتاخدي 50% بس، ولما وافقت قالت لي مش دلوقتي، وكل يوم تقولي استني، وبعدها عملت ليا ولجوزي بلوك على منصات التواصل، وحذفت حساب الشركة من على فيسبوك.
صاحبة الواقعة: شهادة الاعتماد مضروبة وعملت محضر ضدها
وأوضحت أنه خلال محادثاتها مع موظفة الشركة ومواجهتها بعملية النصب، أكدت لها أنها شركة معتمدة حكوميًا، لكن عندما تواصلت مع المسؤولين، اكتشفت أن شهادة الاعتماد تم تزويرها، واستخدام عنوان ورقم شركة أخرى باسم آخر.
وأضافت: قلت لها أنا هعمل محضر، لكن أجابت علي: اعملي، فذهبت لمباحث الإنترنت في مديرية أمن القاهرة، وحررت محضرًا رقم 7 بتاريخ 21 يوليو 2024، في وحدة مكافحة جرائم تقنيات المعلومات.
