فتاة تشكو الازدحام الشديد خلال الحجز بمركز للدروس الخصوصية في شبرا: حبسونا في قاعة وكان ممكن حد يموت
لا تزال معاناة الدروس الخصوصية مع طلاب الثانوية العامة قائمة وتشعل منصات التواصل الاجتماعي، حيث استخدمت فتاة تُدعى بسملة سيد منصة فيسبوك للتواصل كي تشكو من الازدحام الشديد في أحد مراكز الدروس الخصوصية.
فتاة تشكو من الازدحام الشديد أثناء الحجز في مراكز الدروس الخصوصية
نشرت فتاة تُدعى بسملة سيد عبر حسابها الشخصي على منصة فيسبوك للتواصل الاجتماعي، منشورًا تشكو فيه من الازدحام الشديد وسوء المُعاملة داخل أحد مراكز الدروس الخصوصية في حي شبرا مصر، أثناء حجز درس اللغة العربية لأحد المُعلمين المشاهير لـ دفعة الثانوية العامة القادة 2025.
وقالت بسملة عبر منشورها: أتمنى اللي حصل في المركز يبقى ليه واقفة لأن ده كان يوم فظيع.. أنا المفروض نازلة من بيتي الساعة 9 عشان أوصل 10 احجز درس اللغة العربية في المركز حسب المواعيد اللي نازلة على الصفحة.
وأضافت: وصلت هناك 10 إلا وكنت فاكره لسه بدري وهبقى من أول الناس، واتفاجأت لما طلعت لقيت أهل الطلاب كلهم واقفين وقاعدين قدام المركز ومفيش مكان حتى نطلع نشوف فيه إيه، ولما عرفنا وطلعنا كانت منتهى المهزلة ولقيت القاعة مفهاش مكان.. وفيها فوق 500 طالب وده كله الساعة مكنتش جت 10 بالظبط.
صاحبة المنشور: حبسونا 5 ساعات ده غير الخناقات وعدم النظام
وأردفت التفاصيل: وأخدنا كارت وقعدنا وقالوا لنا استنوا عادي وهتحجزوا ومفيش مشكلة، وفضلنا قاعدين 5 ساعات من 10 لـ 3 مستنية في قاعة مقفولة ومحدش عايز يخرجنا، ده غير الخناقات وعدم النظام سواء من المركز أو من مُساعدين المُدرس، بجد كانت حاجة مقدرش أوصفها من عدم الاحترام والبجاحة وحاجات وحشه كتير أوي بجد.
واستكملت الفتاة: ده غير أهل الطلاب اللي كانوا بيتخانقوا كل دقيقة وكل ما نكلم حد من المركز يقولنا ملناش دعوة الميعاد ده المُدرس هو اللي قال عليه، ولما قولنا لمُساعدين المُدرس قالوا برضو ملناش دعوة ده نظام المركز وحرفيًا محدش عايز يشيل المسؤولية بجد كانت إهانة ليا ولغيري، وأنا عن نفسي واحدة عندي فوبيا من الزحمة والأماكن المغلقة، تخيل واحدة زيي يحصل فيها الحاجات دي بجد مش قادرة أوصف شعوري ولا اللي حصلي دي حاجة فوق الوصف.
صاحبة المنشور: لازم الناس تاخد موقف كان ممكن حد يموت
ووصفت قائلة: إحنا كنا محبوسين ومحدش عايز يخرجنا حتى لما قلنا خلاص مش هنحجز، وبيعلوا صوتهم علينا غير كمان أن المفروض أنا كلمت المركز قبل ما أروح قالولي إن المركز مش بيفتح غير 10 يعني قبل كده مقفول.. ازاي بقى أنا أروح 10 إلا وألاقي كل الناس دي، بجد لازم الناس تاخد موقف من المركز ده.. كان ممكن حد يموت، وساعتها مين اللي كان هيشيل المسؤولية، أنا عن نفسي أول ما خرجت انهرت مكنتش قادرة أمشي ولا أقف ولا أتكلم حتى، ده غير تضييع الوقت 5 ساعات من لا شيء.
وأشارت الفتاة صاحبة الواقعة خلال مشاركة التعليقات: على فكرة أنا ولا فارق معايا موضوع إني حجزت أو لا أنا أصلا اللي خرجت بمزاجي وكان فيه بنات لسه جوا ومحبوسة الله أعلم حجزوا ولا لأ.. أنا اللي فارق معايا بجد اللي حصلي وحصل لغيري وإن المركز ده مينفعش أصلا يبقى مكان آمن لينا.
مركز الدروس عبر فيسبوك: تم اكتمال الطلاب.. لأن العدد كان غير متوقع
وأوضحت ذلك خلال مشاركتها لمنشور المركز المؤكد بـ: العدد كان غير متوقع.. حاولنا بقدر الإمكان توفير أماكن لاستقبال عدد أكبر من أبنائنا الطلاب ولكن للأسف تم اكتمال العدد بالمركز ، ونعمل جاهدين لتوفير أماكن أخرى للطلاب تابعوا المزيد، بالتوفيق والنجاح إن شاء الله.
