لقاء سويدان: عندي 50 سنة ولو اتجوزت مش هقدر أخلف.. وتنازلت عن حقوقي بسبب حبي لحسين فهمي
حلت الفنانة لقاء سويدان، ضيفة على أحد البرامج التلفزيونية وتحدثت خلال اللقاء عن تفاصيل وعكتها الصحية الأخيرة وتفاصيل لجوئها للقضاء خلال السنوات الماضية للحصول على حقوقها المادية من الفنان حسين فهمي بعد طلاقهما.
أبرز تصريحات لقاء سويدان
- بعد أقل من أسبوعين هكمل 50 سنة، وأنا عشتهم الحمد لله بالحلو والوحش، ومش هينفع أخبي سني وعندي تصالح، أحلى فترة بالنسبة لي هي سن الأربعين.
- لو اتجوزت حد أصغر مني بكتير في حاجات مش هقدر أعملها، مش هقدر أخلف لو هو عايز يخلف، وجسديا في حاجات أكيد هيبقى عنده طاقة فيها وأنا مش نفس الطاقة.
- وإقباله على حاجات معينة في الحياة بتفكير ثلاثيناتي مختلف عن هدوئي أنا.
- المشاعر ملهاش سن لكن لازم يبقى في حد معين.
- لما اتجوزت حسين فهمي كان أكبر مني بـ 34 سنة وده فرق كبير جدا ولا أنصح بكده، لكن كانت روحه أحسن من أي شاب عمره 25 أو 35 سنة.
- الموعد السنوي للعملية، من 4 سنين تقريبا كل ما ييجي شهر يونيو لازم أعمل عملية، بتحصل حاجة وأفتكرها بسيطة وأدخل المستشفى ألاقي عملية كبيرة.
- أنا السنة اللي فاتت عملت جراحة وشيلت أورام ليفية، وبعدها بفترة فضلت تعبانة، وعندي آلام من أكثر من 7 شهور مش عارفة سببها.
- تعبت جدا وأنا بقدم برنامجي واتنقلت بعربية إسعاف، وكالعادة التشخيص كان حاجة بسيطة، وفي المستشفى اكتشفوا إن عندي فتق جراحي من فترة والأمعاء طالعة برا، والعملية استغرقت 5 ساعات.
- لجأت للقضاء علشان آخد حقوقي المادية من حسين فهمي بعد طلاقنا علشان كنت بحاول أثبت إني لو عاوزة آخد حقي هاخده.
- ربنا قال في مهر وفي مؤخر، والمهر من شروط الزواج، وأنا تنازلت بإرادتي وبحب شديد عن كل ده قبل الزواج لإني كنت مش فارقة معايا حاجة غير إني بحبه.
- في واحدة مش هذكرها لأنها أقل من إني أذكرها الرسالة دي موجهة لها بنسبة 50%، وإذا كانت سبب في الطلاق ربنا مش هيسيبها، لكن هي مش حبيبة.
- أنا قلت قبل كده إنه مكانش خاين وكان زوج مخلص جدا، ومكانش في حد غيري في حياته وقت ما كنا متجوزين.
