المدير الإداري لـ بيراميدز يهاجم اتحاد الكرة بعد الخسارة من الأهلي: إحنا أبطال إننا بننافس
هاجم أحمد زاهر المدير الإداري لنادي بيراميدز، منظومة الكرة المصرية واتحاد الكرة، بعد خسارة فريقه أمام الأهلي أمس الاثنين، في مباراة جمعت الفريقين ضمن منافسات الدوري الممتاز.
تصريحات أحمد زاهر المدير الإداري لـ بيراميدز
وقال أحمد زاهر عبر حسابه على موقع التواصل الاجتماعي فيسبوك: والله أبطال إن إحنا بنافس.. العب من غير الشيبي ده موقوف.. حاضر، العب من غير رمضان صبحي وهو في أعلى فورمة وكان رايح منتخب بحجة منشطات وهمية.. حاضر.
وأضاف المدير الإداري لـ بيراميدز: إبراهيم عادل واحد من أحسن اللاعيبة في مصر هيلعب معاك وبعدها يسافر.. لا معلش ده مصاب يوم 12 ويلعب مع المنتخب 14 سبحان الله، مع إن حقى إنه ميروحش خالص.. بس برضه حاضر.
وتابع مدير بيراميدز الإداري: أكتر حاجة مضحكاني في موضوع إبراهيم عادل تصريحات عضو مجلس الجبلاية، إن اتفاق لعب إبراهيم عادل اللي هو حقي أصلا وممكن ما يسافرش عادي بقرار مني كان بعلم المنافس طب هو ماله بالموضوع أصلا.
وواصل المدير الإداري لـ بيراميدز تصريحاته: إعادة شوط سموحة مع إن اللائحة واضحة وبتقول المباراة تحتسب لبيراميدز.. بس برضه تاني حاضر، أول فريق يلعب بعد التوقف الدولي بيومين مع إن عنده نص الفريق مع المنتخبات في مخالفة صريحة للائحة.. حاضر.
وأكمل: أنت لازم تلعب الساعة 4 وبعدها 5 ونص في عز الحر مع إني بنافس، بس المنافس يلعب عادي بالليل.. حاضر، ومعلش أصل حكم مباراة المقاولون المفروض ميحكمش كارت معاهم لوقت اللزوم نطلعه ظلم واضح من حكام مباراتين الدوري.. ويقولك الدوري ذهب لمن يستحق.
واختتم أحمد زاهر: ناس في الرابطة واتحاد الكرة طلعوا يهاجموا النادي لمجرد إنه بيدور على حقوقه وتقولي منافسة.. إحنا أبطال والله.
