أم لـ3 أطفال│ شقيقة سيدة تزعم: طبيب تسبب في وفاتها.. ولازم يتحاسب
زعمت شقيقة سيدة توفيت خلال ولادة طفلها الثالث بمنطقة شبرا، أن الطبيب المشرف على الولادة تسبب في وفاتها، بسبب الإهمال الطبي.
طبيب يتسبب في وفاة أم لـ 3 أطفال
نيفين راشد السيدة التي تبلغ من العمر 34 عامًا، أم لـ 3 أطفال أكبرهم يبلغ من العمر 4 سنوات، تُوفيت بسبب الإهمال الطبي على يد طبيب النساء والتوليد م. ز.، صاحب أحد مراكز النساء والتوليد في حي شبرا مصر بمنطقة سانت تريز، بحسب شقيقتها، التي دشنت هاشتاج م. ز. لازم يتحاسب بعد الواقعة.
لازم يتحاسب بسبب الإهمال الطبي
وقالت مادونا راشد شقيقة المتوفاة في تصريحات خاصة لـ القاهرة 24: الدكتور م. ز. لازم يتحاسب هو السبب في موت أختي.. ويوم ولادة طفلها الثالث كانت أختي تعبانة وهو أهملها ومكانش عارف ياخد قرار طبي، وهي كانت فاقدة الوعي ووشها أصفر.
وتابعت: من بداية فترة الحمل وهو كان بياخد كل التحاليل بتاعتها، تحاليل الدم والأنيميا، كان بـ يكتفي أنه يعرفها النتيجة بس، لكن كل أوراق التحاليل هو مخبيها ولحد دلوقتي مطلعهاش، الأنيميا كانت 8 قالها لازم تكون 10 عشان الولادة، واكتفى أنه يديها برشام وفعلًا بقت 10 ونص، وفق قولها.
واستكملت: يوم الولادة عرفنا إنها عملت عمليتين مع عملية الولادة، عملية عشان تكتفي بـ إنجاب 3 أطفال فقط، وعملية لـ شد دهون البطن، ولما اتأخرت قالو لنا كدة وخرجت بعد ساعتين تعبانة جدًا وفاقدة الوعي ووشها أصفر، وهو كان موافق على إجراء العمليات دي كلها رغم أنه عارف أن الأنيميا عندها ضعيفة ومتستحملش.
عدم القدرة على اتخاذ قرار طبي سليم
وأردفت: دكتور م. ز. لما لقاها كدة أهمل وضعها الطبي ومكانش عارف ياخد قرار، وكان مُتردد ومُشتت لدرجة إنه قال لنا احتمال أرجعها العمليات تاني، ومبرراته قدامنا كانت مُتقلبة شوية يقول إن عندها جلطات على الرئة وأداها حقن سيولة للدم، وشوية يقول إن عندها انفجار شريان في الرحم واحتمال تدخل عمليات تاني، وشوية وقال هاتوا لها أكياس دم، ده كله كان دليل على عدم القدرة على اتخاذ قرار طبي سليم لصالح أختي.
وأضافت: طلبنا منه إننا ننقلها لرعاية مستشفى تانية.. وتفاجأنا بيه بيقول آه كنت عايز أقولكم كده من بدري، وبالفعل خدناها وروحنا الرعاية المركزة في مستشفى تانية في منطقة حدائق القبة، كانت غير مُجهزة طبيًا وروحناها بناء على ترشيحه لينا بـ اسمها، وأول ما دخلنا والدكاترة شافوا أختي قالوا إن عضلة القلب واقفة، بحسب حديثها.
هبوط في الدورة الدموية فقط
وأكدت أن شقيقتها كانت تعاني من توقف في عضلة القلب، وم. ز. لم يدرك هذا أثناء وجودها في مركزه الطبي.
وأوضحت: جه دكتور م. على مستشفى حدائق القبة وتعمد كتابة التقرير الطبي بنفسه، وكتب سبب الوفاة هبوط في الدورة الدموية فقط.. دون الدخول في أي تفاصيل من اللي حصلت عنده.
واختتمت: أختي ماتت وسابت 3 أطفال صغيرين، وبحذر كل السيدات محدش يروح المركز بتاعه ولا يتعامل معاه، ده مركز أموات ودكتور م. ز. معندوش ضمير وهو السبب في موت أختي، ربنا يجازيه.
