خالد الجندي: بعض الآباء والأمهات يضيعون أعظم مشروع يلقون به الله
حذر الشيخ خالد الجندي، عضو المجلس الأعلى للشئون الإسلامية، من عدم تربية الأبناء تربية سليمة وتضييع أعظم مشروع يلقى به الآباء والأمهات ربهم يوم القيامة، لافتا إلى أن البعض ترك التربية والقيم والأخلاق التي تربينا عليها بسبب أم مغيبة أو أب مشغول.
خالد الجندي: بعض الآباء والأمهات يضيعون أعظم مشروع يلقون به الله
وقال عضو المجلس الأعلى للشئون الإسلامية، خلال حلقة خاصة بعنوان "حوار الأجيال"، ببرنامج "لعلهم يفقهون"، المذاع على فضائية "dmc"، اليوم الأربعاء: "لازم نربي أولادنا على إيه اللي يليق وإيه اللي لا يليق فعله؟ كانت أمي، والله أقسم بالذي أنزل هذا القرآن، فاكرها زي دلوقتي وأنا صغير، تقوليلي: "افرد ظهرك وأنت ماشي، ما حدش كسر عينك، خلي عندك عزة نفس وانت ماشي وأنا طفل صغير مش فاهم الكلام ده فهمته لما كبرت زي ما لقمان كان بيقول لابنه: "وَاقْصِدْ فِي مَشْيِكَ وَاغْضُضْ مِن صَوْتِكَ".
وأضاف: "يعني لازم الأب والأم يتدخلوا في نبرة صوت بنتهم، صوتك ما يعلاش، صوتك ما حصلش فيه كذا وانت بتتكلمي، وانت ماشية وانت بتاكلي وانت بتبصي وانت بتضحكي وانت لابسة وانت كل حاجة يا جماعة، كانوا بيدخلوا في المشي، في الأكل، في الصوت، وانت بتخبطي على الباب ما تخبطيش أكتر من ثلاث مرات، ولما تخبطي على الباب تتنحي على جنب ما تقفيش قدام الباب وانت داخل تسلم على اللي موجودين، وواحد صغير وواحد كبير، معدي هو اللي يعدي قبل منك، وواحد طالع السلم الكبير يطلع قبل منك، ولو ست أنت اللي تطلع قبل منها ما تمشيش، ما تطلعش وراها، وانت نازلة السلم لازم تنزلي قبل منها، ما تنزليش ورا منها علشان تاخدي بيدها لو حصل أي تعثر أو خلافه، ولازم يكون عينك في الأرض لما تكلمي امرأة، ولازم تغسل إيديك.
واختتم: لازم تقصي ضوافرك، لازم تلمع جزمتك، لازم تنظف وشك، لازم تصلي لله سبحانه وتعالى، لازم تشكر ربنا، لازم كل الكلام ده قواعد، فين الكلام ده؟ الكلام ده للأسف الشديد، البعض تركه، لأن أما مغيبه أو أبا مشغولًا، دي الكارثة أعظم مشروع، يا إيها الأب ويا إيتها الأم. هو تربية ابنك اللي هتقابل بيه ربنا يوم القيامة، هو ده عملك الصالح اللي ربنا بيقوله في سورة يس: "إِنَّا نَحْنُ نُحْيِي الْمَوْتَى وَنَكْتُبُ مَا قَدَّمُوا وَآثَارَهُمْ". دي الآثار اللي هتقابل بها الواحد القهار".
