ما شوفتهمش من 3 سنين.. سيدة تستغيث بعد خطف طليقها لأولادها والهرب إلى ليبيا
استغاثت عزيزة السيد، البالغة من العمر 36 عام من طليقها، حيث زعمت أنه خطف أولادها وهرب بهم إلى ليبيا منذ 3 أعوام، وانقطع الاتصال بينهم ولا تتمكن من الوصول إليهم.
سيدة تستغيث بعد خطف أولادها
قالت عزيزة السيد لـ القاهرة 24: احنا مكناش متفقين، هو كان مسافر شغال في ليبيا واطلقنا، بعد الطلاق حصلت على حضانة بنتي كانت في رابعة ابتدائي.
وواصلت عزيزة: بعد ما أطلقنا كان بيقعدوا يومين عنده ويومين عنده، وجيه في مرة قالي إنهم هيطلعوا مصيف، زهرة بنتي مكنتش موافقة لكن ابني كان عايز يروح واقنعتها وراحت.
واستكملت: جاب عربية وخدهم، هما كان معاهم جوازات سفر وبعدين عرفت أنه هرب بيهم وسافر ليبيا، ومن يومها بحاول اتواصل معاه مش بيرد عليا، روحت السفارة ومعايا ورقة الحضانة بس مفيش أي حل بقالي 3 سنين بحاول وصلهم.
وأضافت عزيزة: أنا متكلمتش معاهم غير مرة واحدة بعد الفيضان اللي حصل في ليبيا قعدت ادور على حد من صحاب ابني سيف هناك وكلمته وهو وصلني بيه، لما كلموني قالولي إنهم بيحاولوا يوصلوا لي من زمان ومش عارفين وبنتي كمان كلمتنى وقعدوا يعيطوا، وبعد كده صاحبهم حظرني ومعرفتش اتواصل معاهم تاني.
واختتمت: معرفش عنهم أي حاجة ولا أعرف مكانهم فين، وأهله شايفين أنه عمل الصح لما خد الولاد مني علشان اتجوزت هو كمان اتجوز، أنا بس عايزة اكلمهم اعرف هما عاملين ايه، عاملي حظر على كل حاجة.
