رضا إدريس: يعني إيه أقعد سنتين من غير شغل وأنا فاتح بيت؟
حل الفنان رضا إدريس، ضيفًا على أحد البرامج التلفزيونية، وتحدث خلال اللقاء عن تفاصيل أزمته الصحية الأخيرة، وسبب غيابه عن الساحة الفنية.
أبرز تصريحات رضا إدريس
- أنا بخير وربنا كان معايا ومسابنيش لأن كان عندي ذبحة صدرية حقيقية وربنا نجاني، والدكاترة قالولي إحنا مش عارفين ومالناش يد في حاجة دي ذبحة صدرية غير مكتملة، واللي حصلي ده بسبب الانفعال والبكاء، وأنا سايب كل حاجة على ربنا.
- الناس بتقولي في الشارع أنت فين ومش موجود في الأعمال الفترة دي إزاي، إحنا عايشين الحمد لله في دم الشعب المصري، الشعب حافظنا وعاشرنا والناس معانا من وإحنا شباب لحد قوتنا ده، الشهرة الحمد لله الناس شايفاها لحد الجيل اللي طالع جديد، أنا موجود مع الناس ولكن ياريت الوسط الفني يحبني قد ما الجمهور بيحبني.
- لله الحمد أنا 40 سنة فن بكل موهبة وضمير، ويعلم ربنا إني بروح أعمل الجملة ومبقولش لأ، وهي اللي بتعيش، أنا عملت مشهد واحد في مسلسل أعلى نسبة مشاهدة وخدت جائزة زي زملائي في المسلسل.
- هل أنا مقصر؟ لو عملت مسلسلات وبقبض والدنيا دايرة، مش بعمل كل سنتين عمل أو كل فين وفين يجيلي شغلانة، أو يجي بعد العمر ده كله لقطة وربنا بيبارك فيها أوي، الفن مالوش ذنب في حاجة.
- عايز أصحي الشباب اللي أتربوا على شغلنا ولما يقولهم نجيب رضا إدريس يقولوا إيه ده عمل إيه وريني صورته، دي مش مشكلتي خالص.
- أنا كنت قاعد سنتين مشتغلتش خالص، برمضانين وعيدين ورمضان اللي فات قاعد بتفرج وبقول يا رب هو أنا مش معاهم في مصر؟، أقسم بالله كان فاضل يومين على ليلة القدر وقاعد في بيتي ربنا ساترني وقاعد بكلم ربنا، وجالي تليفون من زميل علشان نشتغل مع بعض في مسلسل أمريكي.
- حسيت وقتها إن ربنا بيقولي رزقك أهو من ورا جبال ومحيطات، وروحت وسافرت وصورت برا الوطن العربي وعيشت في جبال إسبانيا، واعتبرت أن دي طبطبة من ربنا.
- اللي هيجنني إني مطلوب، يعني إيه أقعد بالسنتين مشتغلش وأنا فاتح بيت ومعنديش مصدر دخل تاني خالص غير الفن.
- أنا خبطت على الأبواب وسألت على شغل، ولكن يمكن مش في إيديهم حاجة يمكن دلوقتي الدنيا مقلوبة والمخرج مش هو اللي بيعمل كل حاجة.
- كلمت ناس كتير علشان الشغل وفي فنان عملي حظر علشان بسأله وبكلمه على شغل، وهو نجم مشهور جدًا.
- نور الشريف كان قريب مني وهو اللي كان بيسأل عليا.
- مشوفتش كريم عبد العزيز من فيلم الباشا تلميذ لغاية دلوقتي.
- معنديش مشكلة أنزل مكاتب الكاستينج، ولكن معرفش أروح أفكرهم بيا.
- الموضوع دلوقتي مكان وشلة وكافيه وقاعدة معينة وسهرة، أنا مش في الليالي دي، أنا مش محسوب.
- أنا مش متقدر في الوسط الفني، وأنا مش في دماغهم بالقوة اللي الجمهور شايفني بيها.
- أنا شوفت ناس كتير طلعوا من مشاهد ويقولك مسلسل للنجم، طب هو عمل إيه واللي إحنا بنعمله طول العمر إيه؟ إيه الحكمة؟.
- أبقى طالع ناجح من الحاجة وأقعد قصادها سنتين من غير شغل، استغفر الله العظيم ربنا بيوزع الأرزاق.
- يا حبايبي يا غاليين واحشني يا مخرجين ومنتجين وحشني اللوكيشن، وبيتوكم، وأعمالكم اللي بنسعد بيها، يا أيها المواطنون أحبونا أحبكم الله.
