رئيس البعثة الطبية في أولمبياد باريس مدافعًا عن جنى علي: اللاعبون يخافون من السوشيال ميديا أكثر من المنافسين
وجه الدكتور حسن كمال رئيس البعثة الطبية المصرية في أولمبياد باريس 2024، رسالة إلى الجماهير بعد واقعة جنى علي لاعبة منتخب القوس والسهم، وحصولها على المركز الـ63 من أصل 64 في المرحلة الترتيبية.
رئيس البعثة الطبية في الأولمبياد يدافع عن جنى علي
وكتب حسن كمال عبر حسابه الشخصي على فيسبوك: مساء الخير، حيث أنني أتشرف بكوني رئيس البعثة الطبية المصرية في الأوليمبياد، والصحة النفسية جزء من مسئولياتنا تجاه اللاعبين، خليني اشرحلكم حاجة.
وأضاف: البعثة -زي أي بعثة في العالم- مكونة من 4 مستويات من اللاعبين، أولًا: أبطال مرشحين للحصول على ميداليات، ثانيًا: أبطال محتملين مش مرشحين لكن قريبين، ثالثًا: لاعبين متوسطين في المستوى هيكونوا في مراكز متوسطة لكن صعب يحققوا، وأخيرًا: لاعبين مؤهلين لكنهم بعاد عن المنافسة لكن وجودهم مهم ليهم ولتأسيس مستقبل اللعبة في مصر ورفع المستوى تدريجيًا.
وواصل: سعادتك لما بتتريق على اللي خسر وكان بعيد وتعمل حفلة كبيرة عليه مش بتغير نتيجته خلال الدورة، أنت بتحط ضغط رهيب على الناس القريبة من تحقيق ميدالية، واللي لسه هتلعب.
وأكمل: اللعيبة بقت تخاف من السوشيال ميديا أكتر ما بتخاف من المنافسين، أنا أتمنى في يوم أقدر أقول لكل اللعيبة ما تخافوش، الناس في ضهركم سواء كسبتم أو خسرتم، وأتمنى تكونوا في ضهرهم فعلًا، لأن اللاعبين اللي هنا دول أبطال شبه كل بيت وكل واحد فيكم، وبقوا أبطال أولمبيين واقفين في وسط العالم كله وبتكلفة لا تقارن بألعاب تانية ولا بدول تانية، الشباب مستنيين تشجيعكم وإن شاء الله يرفعوا راسكم.
واختتم: الصورة صباح اليوم مع بطلة القوس والسهم جنى علي لما لقيتها قاعدة لوحدها، وقلتلها أنا فخور بيكي وقومي نتصور، وهى شابة لطيفة وطيبة جدا على فكرة، وبطلة كبيرة على مستوى قارة إفريقيا وإن شاء الله اللي جاي أفضل.
