نجل فؤاد المهندس بعد حريق منزله: بيتي كله اتحرق وعايش في أوضة أبويا
كشف محمد نجل الفنان الراحل فؤاد المهندس، تفاصيل حالته الصحية ومستجدات حريق شقته خلال الفترة الماضية بمنطقة الزمالك، مؤكدًا أن الحريق سبب العديد من الخسائر، ولكنه يؤمن بقضاء الله.
وقال نجل فؤاد المهندس في تصريح خاص لـ القاهرة 24: أنا الحمد لله زي الفل وربنا كبير وكل حاجة هتبقى زي الفل، أنا لسه قدامي شهر والبيت يبقى زي ما هو، ودي إرادة ربنا، أنا مؤمن وحاسس أن ربنا بيعملي ده خير، طبعًا الحريق كان ضربة جامدة ولكن حاسس أن ربنا شايلي الأحسن وإرادة ربنا أن كل حاجة تبقى جديدة، يعني لبسي راح واتحرق وهجيب لبس جديد، والشقة اتحرقت هعملها جديدة براحتي، دي إرادة ربنا وله في ذلك حكم.
وأوضح نجل فؤاد المهندس، أنه حاليًا يقطن بغرفة والده الراحل بمنزله إلى أن ينتهي من إصلاح المنزل، قائلًا: أنا عايش في أوضة أبويا، الأوضة اللي كان الأستاذ بينام فيها، وأنا لسه عندي مقتنيات من بتاعة أبويا ولكن مش هعرف أحصرها إلا بعد إصلاح الشقة من الحريق، وطبعًا هفضل محتفظ بـ مقتنيات أبويا وهديها لـ ابني، دي حاجات بتاعة الأستاذ.
واختتم نجل فؤاد المهندس: أنا الحمد لله ومؤمن بـ ربنا ومؤمن أن ربنا بيجبلي حاجات كويسة، ده إيماني ودعاء أبويا وأمي.
حريق منزل نجل فؤاد المهندس
وسبق وأن اندلع حرق في منزل نجل الفنان فؤاد المهندس، وتبين من المعاينة أن الحريق اندلع بغرفة نوم داخل شقة، بسبب حدوث ماس كهربائي في الغرفة وتصاعدت النيران بشكل كبير والتهمت محتويات الغرفة.
