كلنا إخوة وأنا مرضي.. صديق اللاعب مروان عطيه يكشف تفاصيل مكالمة التصالح مع إمام عاشور | صورة
كشف الشاب محمد أشرف، صديق اللاعب مروان عطيه، نجم النادي الأهلي، منذ قليل، عن تفاصيل الصلح بينه وبين اللاعب إمام عاشور نجم الأهلي.
وكتب أشرف، في منشور عبر صفحته على موقع التواصل الاجتماعي فيسبوك قائلا: بسم الله.. (وإن تعفوا وتصفحوا وتغفروا فإن الله غفور رحيم).. بالنسبة للموضوع اللي كان حاصل بيني وبين الكابتن إمام عاشور، فـ الموضوع كان خلصان في وقتها والكابتن إمام برا القاعة رضاني بعد ما عرف إن القصة كانت سوء فهم مش أكتر والموضوع خلص.
والفيديو لما نزل على السوشيال فيه ناس خدته في سكة أهلي وزمالك، لكن الناس مشافتش اللي حصل بيني وبين الكابتن إمام برا القاعة، الناس شافت الفيديو اللي فيه المشكله بس، والكابتن إمام اتصل بيا وكلمني كذا مرة النهاردة، وكلمني فيديو وقالي أوعى تكون لسه زعلان على سوء التفاهم، والراجل اتكلم بكل احترام وأنا شكرته على أسلوبه وأنه رضاني والموضوع انتهى.
فياريت الناس الكويسة الي يهمها الحق وملهاش علاقة بأهلي وزمالك، حصل سوء فهم واتزقيت، ولما الصورة وضحت الراجل تفهم الموضوع، سواء وقتها أو بعد كده، وأنا الحمد لله مرضي والحمد لله إن الموضوع خلص وعدا وفات، اللي يهمه شخصي فـ أنا اتراضيت والموضوع خلص، واللي واخد المسألة شخصية وأهلي وزمالك ف ده ربنا يهديه لنفسه ولحاله.
وفي النهاية وبعيدا عن الكورة كلنا إخوة وحبايب وكل التقدير والاحترام لكل الناس المحترمة اللي اتدخلت في الموضوع.
وكان أشرف صديق اللاعب مروان عطيه، قد تعرض للاعتداء من قبل لاعب الأهلي إمام عاشور، أثناء حفل زفاف صديقه، وقد تم تداول مقطع فيديو يوثق لحظة التعدي، مؤكدا أنه تم الصلح فيما بينهما خارج القاعة.
